თინა ბოკუჩავას განცხადებით, სააკაშვილის კრიტიკანარევი პოსტები გულდასაწყვეტია

თინა ბოკუჩავას განცხადებით, გულდასაწყვეტია სააკაშვილის კრიტიკანარევი პოსტები. „ნაციონალური მოძრაობის“ ჯერ კიდევ მოქმედი თავმჯდომარის განცხადებით, ერთ დღეს განახლებული ნდობით მანდატი მისცეს, რამდენიმე დღის შემდეგ კი საპირისპირო შინაარსის განცხადებები წაიკითხა.

ბოკუჩავას განცხადებით, ამაში გარკვეულ როლი ითამაშეს იმ კომუნიკატორებმა, რომლებიც სააკაშვილთან ყოველდღიურად შედიან, თუმცა, თინა ბოკუჩავამ არ დაასახელა, კონკრეტულად ვის გულისხმობს.

პოსტი გამოაქვეყნა ანა წითლიძემაც. „ნაციონალური მოძრაობის“ წევრის თქმით, ბოლო ორი წელია, პარტიაში ფასადური დემოკრატიაა.

„ნაციონალური მოძრაობის“ პარტიულ ყრილობამდე, მიხეილ სააკაშვილის ერთპიროვნული გადაწყვეტილებით, პარტიის თავმჯდომარე ნანუკა ჟორჟოლიანი ხდება. მან სოციალურ ქსელში გამოაქვეყნა პოსტი, რომელშიც აღნიშნულია, რომ ჟორჟოლიანმა პარტიულ ორგანიზაციებთან შეხვედრები უკვე დაიწყო.