თორნიკე ჭეიშვილი 26 მაისის აქციაზე: ოპოზიციას არანაირი პერსპექტივა არ გააჩნია, უბრალოდ შეიძლება, თუნდაც იმ გარე პატრონებთან მომავალი ურთიერთობისთვის, მათ ახლა სჭირდებათ, რომ როგორმე გუშინდელი კრახი შენიღბონ და მონათლონ იმგვარად, თითქოს ყველაფერი კარგადაა

ოპოზიციას არანაირი პერსპექტივა არ გააჩნია, უბრალოდ შეიძლება, თუნდაც იმ გარე პატრონებთან მომავალი ურთიერთობისთვის, მათ ახლა სჭირდებათ, რომ როგორმე გუშინდელი კრახი შენიღბონ და მონათლონ იმგვარად, თითქოს ყველაფერი კარგადაა, - განაცხადა „დღის ქრონიკაში" იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა 26 მაისის აქციაზე საუბრისას.

დეპუტატის თქმით, ქართველი ამომრჩევლის უმრავლესობამ დიდი ხანია ოპოზიციას განაჩენი გამოუტანა.

„ოპოზიციაში ცდილობენ იხტიბარი არ გაიტეხონ და როგორმე შეინარჩუნონ სახე საკუთარი მხარდამჭერების წინაშე. ეს სახე რეალურად დიდი ხანია, რაც დაკარგეს და ქართველ ამომრჩეველთა უმრავლესობამ დიდი ხანია მათ გამოუტანა საკუთარი პოლიტიკური განაჩენი. ღიმილისმომგვრელია მათი მხრიდან რაღაც მეორე ფაზაზე საუბარი, იმის გათვალისწინებით, რომ გუშინვე გაიჟღერა აქციის ორგანიზატორების მხრიდან ასეთმა ფრაზამ, რომ შეკრებაზე იმყოფებოდნენ ე.წ. უჩინარი წევრები. არ ვიცი, რაღაც ფანტომებთან ერთად თუ აპირებენ, რომ საქართველო მოიარონ და დალაშქრონ, მხოლოდ წარმატება შეგვიძლია ვუსურვოთ. რეალურად, მათ რომ არავითარი რესურსი არ გააჩნიათ ხალხთან საუბრის, ეს გამოჩნდა რამდენიმე კვირის წინ, როდესაც მათ ჯერ დააანონსეს „კარდაკარ“-ის მაგვარი და საბოლოო ჯამში ჩვენ ვიხილეთ ცარიელი სივრცეები და შეხვედრების დარბაზები. მათ არანაირი პერსპექტივა არ გააჩნიათ. უბრალოდ შეიძლება, თუნდაც იმ გარე პატრონებთან მომავალი ურთიერთობისთვის, მათ ახლა სჭირდებათ ის, რომ როგორმე გუშინდელი კრახი შენიღბონ და მონათლონ იმგვარად, თითქოს ყველაფერი კარგადაა, მაგრამ რეალურად ყველამ ყველაფერი ცხადად დაინახა", - აღნიშნა ჭეიშვილმა.