თორნიკე ჭეიშვილი: საკმარისზე მეტი დრო გავიდა იმისთვის, რათა ბრიუსელს მოეხდინა რეაგირება პრემიერ-მინისტრის ღია წერილზე - ეს თავისთავად არის პასუხი, რომელიც მეტყველებს იმაზე, რომ საქმე გვაქვს ორმაგ სტანდარტებთან

საკმარისზე მეტი დრო გავიდა იმისთვის, რათა ბრიუსელს მოეხდინა რეაგირება საქართველოს პრემიერ-მინისტრის ღია წერილზე, თუმცა, ამ შემთხვევაშიც ჩვენ მივიღეთ ქრონიკული დუმილი, - აცხადებს იურიდიულ საკითხთა კომიტეტის თავმჯდომარის პირველი მოადგილე თორნიკე ჭეიშვილი კოპენჰაგენში განვითარებული პროცესების შესახებ.

მისი თქმით, ეს თავისთავად არის პასუხი, რომელიც მეტყველებს იმაზე, რომ საქმე გვაქვს ორმაგ სტანდარტებთან.

„ეს მეტყველებს იმაზეც, რომ საქართველოსთან მიმართებით ბრიუსელს ჰქონდა ერთმნიშვნელოვნად უსამართლო დამოკიდებულება, როდესაც ძალადობრივი პროტესტის წინააღმდეგ მიმართული კონკრეტული ზომები მათ ძალიან მწვავედ გააკრიტიკეს, მაშინ როდესაც იყო შესაბამისი სტანდარტები დაცული“, - აღნიშნავს ჭეიშვილი.

დანიაში აქციის დასაშლელად პოლიციამ ხელკეტები გამოიყენა. ვრცელდება ვიდეოც, სადაც პოლიცია მედიის წარმომადგენელსაც გაუსწორდა ფიზიკურად.

კოპენჰაგენში განვითარებული მოვლენების შესაფასებლად, საქართველოს პრემიერ-მინისტრმა ურსულა ფონ დერ ლაიენს, ანტონიო კოშტასა და რობერტა მეცოლას ღია წერილით მიმართა.

დანიის მხარეს მოვლენების შესაფასებლად „ქრონიკამაც“ მიმართა, რაზეც „იმედს“ დანიის ეროვნულმა პოლიციამ უპასუხა, რომ პოლიციას დროებით მოუწია ხელკეტების გამოყენება მას შემდეგ, რაც აქციის მონაწილეებმა უკანონოდ გადაკვეთეს კერძო საკუთრებაში არსებული ტერიტორია და უარი განაცხადეს პოლიციის მითითებების შესრულებაზე.