თორნიკე ფაღავა: „ნაცმოძრაობის“ თავმჯდომარემ პირდაპირ ეთერში შეიტყო, რომ ხვალ აღარ იქნება თავმჯდომარე და აპირებენ ახალი თავმჯდომარის არჩევას და ეს ყველაფერი მოხდება ერთი კაცის ბრძანებით ციხიდან. სასაცილოა უბრალოდ მათი მხრიდან შიდა პარტიულ დემოკრატიაზე საუბარი. რაც შეეხება ალიანსს, როგორც ვიწინასწარმეტყველეთ ალიანსმა 26 მაისი ვერ გადალახა

ასე ხდება, როდესაც ადამიანებს არ აქვთ იდეოლოგიური ერთობა, ასე ხდება, როდესაც ადამიანები არ არიან ორიენტირებული საზოგადოების ინტერესებზე, ასე ხდება, როდესაც ისინი ფიქრობენ მხოლოდ და მხოლოდ ძალაუფლების ხელში ჩაგდებაზე, - ასე გამოეხმაურა „დღის ქრონიკასთან“ საუბრისას ევროპასთან ინტეგრაციის საპარლამენტო კომიტეტის თავმჯდომარის მოადგილე თორნიკე ფაღავა ოპოზიციაში არსებულ არეულობას.

მისი თქმით, ოპოზიციური გაერთიანების ბედი ჯერ კიდევ მისი შექმნის დღიდან კრახისთვის იყო განწირული.

რაც შეეხება „ნაციონალურ მოძრაობას“, ფაღავას განცხადებით, სასაცილოა, როდესაც ეს პარტია შიდა პარტიულ დემოკრატიაზე საუბრობს იმ ფონზე, როდესაც მოქმედი თავმჯდომარე პირდაპირი ეთერის საშუალებით იგებს, რომ მის ჩანაცვლებას აპირებენ.

„რაც შეეხება მათი დაპირისპირების ანატომიას, დარწმუნებული ვარ, რომ საზოგადოებისთვის ეს აღარ არის საინტერესო. უბრალოდ ხაზგასმით მინდა აღვნიშნო ის, რომ პარტიები, რომლებიც გამოდიან, მათ შორის „ნაციონალური მოძრაობა“, ალიანსის წევრები და საუბრობენ გამჭვირვალობაზე, შიდა პარტიულ დემოკრატიაზე, ვხედავთ, რომ მაგალითად დღეს „ნაციონალური მოძრაობის“ თავმჯდომარემ პირდაპირ ეთერში შეიტყო ის, რომ ხვალ აღარ იქნება თავმჯდომარე და აპირებენ ახალი თავმჯდომარის არჩევას და ეს ყველაფერი მოხდება ერთი კაცის ბრძანებით ციხიდან. ანუ სასაცილოა უბრალოდ დემოკრატიულ პროცესზე, შიდა პარტიულ დემოკრატიაზე საუბარი. რაც შეეხება ალიანსს, როგორც ვიწინასწარმეტყველეთ ალიანსმა 26 მაისი ვერ გადალახა. ის ნარჩენები, რაც დარჩა ალიანსში, დარწმუნებული ვარ, რომ ისიც მალე გაქრება“, - განაცხადა თორნიკე ფაღავამ.

ცნობისთვის, „ნაციონალური მოძრაობის“ თავმჯდომარისთვის მოულოდნელი აღმოჩნდა მიხეილ სააკაშვილის განცხადება, რომ მას პოსტზე ნანუკა ჟორჟოლიანი შეცვლის.

რამდენიმე დღის წინ სააკაშვილმა სოციალურ ქსელში „რადიკალური ცვლილებები“ დააანონსა. როგორც სააკაშვილმა დაწერა, „ნაციონალურ მოძრაობას“ ნანუკა ჟორჟოლიანი უერთდება.