თორნიკე ფაღავა რასა იუკნევიჩიენეს ანგარიშზე: ჩვენთვის, როგორც ამ ქვეყნის მოქალაქეებისთვის და ხელისუფლების წარმომადგენლებისთვის ევროპარლამენტის მსგავსი ტიპის გადაწყვეტილებები არის გულდასაწყვეტი, მაგრამ პოლიტიკური თვალსაზრისით არანაირი წონა არ გააჩნია

ევროპარლამენტის მიერ მიღებული რასა იუკნევიჩიენეს ანგარიში ევროპასთან ინტეგრაციის საპარლამენტო კომიტეტის თავმჯდომარის მოადგილემ თორნიკე ფაღავამ „დღის ქრონიკაში“ შეაფასა. როგორც დეპუტატმა აღნიშნა, ქართულმა საზოგადოებამ ეს „კინო“ მრავალჯერ ნახა და მსგავსი ტიპის რეზოლუციებს ყავლი გაუვიდა.

„ევროპარლამენტი ერთ წრეზე ტრიალებს. ჩვენდა სამწუხაროდ, ევროპარლამენტი და ევრობიუროკრატია თავისი ქმედებებით ძირს უთხრიან ქართული საზოგადოების ნდობას ევროკავშირის მიმართ.

რაც შეეხება ამ რეზოლუციას, ძირითადი აქცენტი გაკეთებულია მედიასაშუალებებზე და ცალკეულ მაღალი პოლიტიკური თანამდებობის პირების სანქცირებაზე. სანქცირების ნაწილი კი სცდება ყველა სამართლებრივ არგუმენტაციას. არ არსებობს არანაირი სამართლებრივი საფუძველი, რის გამოც შეიძლება ნებისმიერი ქართველი მაღალი პოლიტიკური თანამდებობის პირის დასანქცირება. აქედან გამომდინარე, საფუძველს მოკლებულია ეს მოთხოვნა, რაც შეეხება მედიასაშუალებების დასანქცირებას, აქ პირდაპირ შეიძლება ითქვას, რომ ეს არის თავდასხმა სიტყვისა და გამოხატვის თავისუფლებაზე საქართველოში.

ქალბატონ რასა იუკნევიჩიენეს, ვინც ეს რეზოლუცია დააინიცირა, ავიწყდება მთავარი ევროპული ღირებულება, რომ კრიტიკის მიღმა არ არის არავინ და მათ შორის არც ქალბატონი რასა.

ქართული მედია და ქართველი პოლიტიკოსები არაფერს განსხვავებულს არ ამბობენ, რასაც არ ამბობს აშშ-ის მოქმედი ადმინისტრაცია, ბატონი ტრამპი, ბატონი რუბიო, თუ დააკვირდებით, ერთი ერთში ემთხვევა ჩვენი დამოკიდებულებები, შეხედულებები და რიტორიკაც კი, მოქმედ ევრობიუროკრატიასთან დაკავშირებით.

ჩვენთვის, როგორც ამ ქვეყნის მოქალაქეებისთვის და ხელისუფლების წარმომადგენლებისთვის ევროპარლამენტის მსგავსი ტიპის გადაწყვეტილებები არის გულდასაწყვეტი, მაგრამ პოლიტიკური თვალსაზრისით არანაირი წონა არ გააჩნია“, - აღნიშნა ფაღავამ.

ევროპარლამენტმა საქართველოს შესახებ რასა იუკნევიჩიენეს ანგარიში მიიღო.