ტრამპის მიერ „მასშტაბურ გარიგებაზე“ განცხადების შემდეგ, ლუკაშენკო აცხადებს, რომ კალიუმის სასუქის მარაგები ამოწურულია

ბელარუსის ლიდერმა, ალექსანდრე ლუკაშენკომ განაცხადა, რომ აშშ-ისთვის მისაწოდებელი სასუქის თავისუფალი რესურსი არ არსებობს. ამ განცხადებას წინ უძღოდა პრეზიდენტ ტრამპის სიტყვები იმის შესახებ, რომ კანადასთან სავაჭრო ომის ფონზე, ის მინსკისგან კალიუმის სასუქის დიდი ფასდაკლებით შესასყიდად „მასშტაბურ გარიგებაზე“ მუშაობდა.

„დასავლეთის სხვა ბაზრებზე [კალიუმის სასუქის] მიწოდებაც რომ გვინდოდეს, ამის მოცულობა უბრალოდ არ გვაქვს - ყველაფერზე კონტრაქტები უკვე გაფორმებულია“, - განაცხადა ლუკაშენკომ ორშაბათს, მისი ადმინისტრაციის მიერ გამოქვეყნებულ კომენტარში.

ტრამპმა საკუთარ სოციალურ ქსელ Truth Social-ში დაწერა, რომ ბელარუსიდან კალიუმის სასუქის შესყიდვა „ძალიან კარგი სიახლე იქნება ამერიკელი ფერმერებისა და მესაქონლეებისთვის“.

„შეერთებული შტატები ბელარუსიდან კალიუმის სასუქის შესყიდვასთან დაკავშირებით მასშტაბურ გარიგებაზე მუშაობს. ფასი ბევრად ნაკლები იქნება იმაზე, რასაც ამჟამად კანადას ვუხდით“, - აღნიშნა მან.

კალიუმის სასუქი სასუქების საკვანძო კომპონენტია, კანადა კი მის უმსხვილეს მიმწოდებელს წარმოადგენს მსოფლიოში - მისი ექსპორტის 53 პროცენტი სწორედ აშშ-ზე მოდის. Canada Press-ის ინფორმაციით, ამერიკულ ფერმებში გამოყენებული კალიუმის სასუქის 80 პროცენტი სწორედ კანადიდან არის იმპორტირებული.