თურქეთმა ზედიზედ მეორე თამაში წააგო და ჯგუფში ჩარჩა

თურქეთის ეროვნულმა ნაკრებმა მიმდინარე საფეხბურთო მსოფლიო ჩემპიონატზე D ჯგუფის ფარგლებში გამართული მეორე მატჩი წააგო.

ამჯერად თურქეთის ნაკრების მეტოქე პარაგვაის გუნდი იყო. პარაგვაელებმა ანგარიში მეორე წუთზე გახსნეს. გატანილი გოლის ავტორი პარაგვაელთა ნახევარმცველი მატიას გალარსა იყო.

აღსანიშნავია, რომ პირველი ტაიმის დამატებით დროში მატჩის მთავარმა არბიტრმა პარაგვაის ნაკრების ფეხბურთელი მიგელ ალმირონი მოედნიდან გააძევა. პარაგვაელებს თამაშის დასრულება ათი კაცით მოუწიათ.

ორი ტურის შემდეგ D ჯგუფში პირველ ადგილს ექვსი ქულით აშშ-ის ეროვნული ნაკრები იკავებს. მეორე და მესამე ადგილებს სამ-სამი ქულით ავსტრალიისა და პარაგვაის ნაკრებები იყოფენ, ხოლო თურქეთის ეროვნული გუნდი ნული ქულით ბოლო ადგილზეა, რაც იმას ნიშნავს, რომ ვიჩენცო მონტელას შეგირდები მუნდიალის მეორე ეტაპზე გადასვლას ვერ მოახერხებენ.

თურქეთის ნაკრებს აშშ-ის გუნდთან აქვს დარჩენილი თამაში, რომელიც 26 ივნისს გაიმართება. თურქები აღნიშნული მატჩის მოგების შემთხვევაშიც D ჯგუფში ჩარჩებიან და მუნდიალს გამოეთიშებიან.