უკრაინული მედია: რუსეთის მასშტაბური საჰაერო იერიშის შედეგად კიევში 10 ადამიანი დაიღუპა, სულ მცირე 56 დაშავდა
რუსეთმა გვიან ღამით კიევსა და უკრაინის სხვა ქალაქებზე მასშტაბური სარაკეტო და დრონებით შეტევა განახორციელა. ინფორმაციას უკრაინული მედია ავრცელებს.
მედიის ცნობით, იერიში რამდენიმე საათში მოხდა მას შემდეგ, რაც უკრაინის პრეზიდენტმა ვოლოდიმირ ზელენსკიმ მოსახლეობა გააფრთხილა, რომ რუსეთი ქვეყნის წინააღმდეგ კიდევ ერთი ფართომასშტაბიანი შეტევისთვის ემზადებოდა.
კიევის საქალაქო-სამხედრო ადმინისტრაციის ხელმძღვანელის ტიმურ ტკაჩენკოსა და ქალაქის მერის ვიტალი კლიჩკოს განცხადებით, თავდასხმის შედეგად 10 ადამიანი დაიღუპა, ხოლო სულ მცირე 56 დაშავდა, მათ შორის ორი ბავშვი.
მათივე ინფორმაციით, რუსეთმა კიევის მიმართულებით ათობით ფრთოსანი და ბალისტიკური რაკეტა გაუშვა. თავდასხმა ასევე მოიცავდა დრონების მასშტაბურ იერიშს უკრაინის რამდენიმე რეგიონზე.
დაბომბვის შედეგად განადგურდა საცხოვრებელი სახლები, დაზიანდა კიევის ცენტრში მდებარე სასტუმრო, ხოლო მრავალსართულიან შენობებში ხანძარი გაჩნდა. ადგილობრივი დროით დილის 07:00 საათისთვის, შეტევის შედეგად, ქალაქის ყველა რაიონში 30-ზე მეტ ადგილზე ნგრევა და დაზიანება იყო დაფიქსირებული.
„მტერი კვლავ საცხოვრებელ უბნებს უტევს და მშვიდობიან მოსახლეობას კლავს. ნგრევა ძალიან მასშტაბურია და დაშავებულთა შორის ბავშვებიც არიან,“ - განაცხადა ტიმურ ტკაჩენკომ.
