უკრაინული მედია: რუსეთმა ბალისტიკური რაკეტით კიევში თავდაცვის მრეწველობის გამოფენის ტერიტორია დაბომბა. დაიღუპა ექვსი ადამიანი

რუსეთმა კიევზე განხორციელებული ბალისტიკური სარაკეტო დარტყმის დროს უკრაინის დედაქალაქში მიმდინარე თავდაცვის მრეწველობის გამოფენის ტერიტორია დაბომბა. ინფორმაციას უკრაინული მედია ავრცელებს.

უკრაინის პრეზიდენტის მრჩევლის სერჰი ბესკრესტნოვის თქმით, რომელიც ღონისძიებას თავადაც ესწრებოდა, თუმცა არ დაშავებულა, გამოფენა კიევის მახლობლად, ჟიტომირის ავტომაგისტრალის მიმდებარე სასწავლო პოლიგონზე იმართებოდა.

„არიან დაღუპულები და დაშავებულები“, - განაცხადა მან.

მოგვიანებით უკრაინის პრეზიდენტმა ვოლოდიმირ ზელენსკიმ სოციალურ ქსელში დაწერა, რომ თავდასხმის შედეგად სულ მცირე ექვსი ადამიანი დაიღუპა, ხოლო „ათეულობით“ დაშავდა.

ზელენსკის არ დაუკონკრეტებია, სად მოხდა დარტყმა და რა სახის ღონისძიება მიმდინარეობდა იმ დროს.

მალევე უკრაინის თავდაცვის მრეწველობის საბჭომ სოციალურ ქსელში განაცხადა, რომ „კიევის ოლქში მტრის სარაკეტო დარტყმა განხორციელდა იმ ადგილზე, სადაც უკრაინის თავდაცვის მრეწველობის წარმომადგენლები იმყოფებოდნენ“.

„ვუსამძიმრებთ დაღუპულთა ოჯახებსა და ახლობლებს და დაშავებულებს სწრაფ გამოჯანმრთელებას ვუსურვებთ“, - ნათქვამია განცხადებაში.