უკრაინულმა დრონებმა რუსეთის ტოლიატისა და ტაგანროგის საწარმოებზე იერიში მიიტანეს

უკრაინულმა ძალებმა 12 სექტემბერს რუსეთის ქალაქებში ტოლიატისა და ტაგანროგში სამრეწველო ობიექტებზე იერიში მიიტანეს. ინფორმაციას უკრაინული მედია ავრცელებს.

რუსული ტელეგრამ-არხების ცნობით, უკრაინულმა შორი მანძილზე მოქმედმა დრონებმა სამარის ოლქის ქალაქ ტოლიატიში რეზინის საწარმოს დაარტყეს.

„რუსეთის დეტროიტად“ ცნობილი ტოლიატი უკრაინის საზღვრიდან დაახლოებით 900 კილომეტრში მდებარეობს და რუსეთში უმსხვილესი სახელმწიფო საკუთრებაში არსებული ავტომწარმოებლის, AvtoVAZ-ის, მთავარი საწარმოო ბაზაა.

ტოლიატის მცხოვრებლების მიერ გადაღებულ კადრებში, სავარაუდოდ, ჩანს ქალაქის თავზე გადაფრენილი უკრაინული დრონები და ცეცხლმოკიდებული შენობა.

უკრაინულმა დრონებმა ტოლიატიში მდებარე რეზინის საწარმო 12 ივნისსაც დაბომბეს. მაშინ თავდასხმა უკრაინის გენერალურმა შტაბმა დაადასტურა და განაცხადა, რომ საწარმო დაზიანდა. უწყების ცნობით, ქარხნის პროდუქცია გამოიყენება „ტაქტიკური და ბალისტიკური რაკეტებისთვის მყარი სარაკეტო საწვავის შემდგომი წარმოებისთვის“.

უკრაინული დრონების სამიზნე, სავარაუდოდ, როსტოვის ოლქის ქალაქ ტაგანროგში მდებარე ავტომობილების საწარმოც გახდა. ქალაქი აზოვის ზღვის სანაპიროზე, უკრაინის საზღვრიდან დაახლოებით 40 კილომეტრში მდებარეობს.