უკრაინულმა დრონებმა რუსული კომპანია Wildberries-ის კიდევ ორი საწყობი დაბომბეს

უკრაინულმა დრონებმა გვიან ღამით რუსული ონლაინ-ვაჭრობის გიგანტის Wildberries-ის კიდევ ორ საწყობს დაარტყეს. ინფორმაციას უკრაინული მედია ავრცელებს.

მედიის ცნობით, კომპანია Wildberries-ი უკვე რამდენიმე კვირაა უკრაინის მიზანმიმართული დარტყმების სამიზნეა.

პენზის ოლქის გუბერნატორის ოლეგ მელნიჩენკოს ინფორმაციით, დარტყმა ქალაქ პენზაში მდებარე Wildberries-ის საწყობზე განხორციელდა. თავდასხმის შედეგად ერთი ადამიანი დაშავდა, ხოლო ტერიტორიიდან 200-ზე მეტი ადამიანის ევაკუაცია გახდა საჭირო.

კიდევ ერთი თავდასხმა Wildberries-ის საწყობზე უდმურტეთის რესპუბლიკაში, ქალაქ სარაპულის მახლობლად განხორციელდა.

უკრაინის უპილოტო სისტემების ძალების სარდალმა, რობერტ „მადიარმა“ ბროვდიმ, თავდასხმები დაადასტურა. მისი თქმით, ოპერაციის დაწყებიდან მოყოლებული, ეს Wildberries-ის მერვე და მეცხრე ობიექტებია, რომლებზეც იერიში განხორციელდა.

„ამანათი ვერ მიაღწევს დანიშნულების ადგილამდე - არც პენზაში, არც წითელ არმიაში... უკაცრავად, უდმურტეთში“, - დაწერა ბროვდიმ ირონიულად „ტელეგრამის“ საკუთარ არხზე.

Wildberries, რომელიც რუსეთის ონლაინ-ვაჭრობის ბაზრის დაახლოებით ნახევარს აკონტროლებს, ბოლო პერიოდში უკრაინული დრონების არაერთი თავდასხმის სამიზნე გახდა. ცეცხლი გაუჩნდა კომპანიის საწყობებსა და ლოგისტიკურ ცენტრებს მოსკოვის ოლქში, სანქტ-პეტერბურგში, ტიუმენში, კრასნოდარში, რიაზანსა და სხვა რეგიონებში.