ვანო ჩხარტიშვილი: „ტერაბანკისა“ და სასტუმრო „ბილტმორის“ გასხვისების პროცესთან ჩემი სახელის დაკავშირება სრულიად უსაფუძვლოა და „ტვ პირველის“ მხრიდან სიცრუის მორიგ ტირაჟირებას წარმოადგენს

ბიზნემენი ვანო ჩხარტიშვილი განცხადებას ავრცელებს, რომელსაც უცვლელად გთავაზობთ.

„ტვ პირველის“ მიერ ჩემ შესახებ გავრცელებული ინფორმაცია სიმართლეს არ შეესაბამება. არც „ტერაბანკისა“ და არც სასტუმრო „ბილტმორის“ შესაძლო გასხვისების პროცესში ვყოფილვარ ჩართული, არც შუამავლობა გამიწევია და არც სიუჟეტში დასახელებულ პირებთან მქონია შეხვედრა ამ საკითხზე.

ბოლო წლებია საქართველოში ჩემი საქმიანობა ძირითადად სოციალურ პროექტებს უკავშირდება. მიუხედავად ამისა, როგორც ბიზნესმენს, კანონიერ საქმიანობასა და გარიგებებში მონაწილეობას არავინ მიკრძალავს.

არასოდეს დამიმალავს რომელიმე ბიზნესპროექტში ჩემი მონაწილეობა და არც მომავალში ვაპირებ ამის გაკეთებას. მით უმეტეს, საბანკო სექტორში საკუთრების ცვლილების გასაიდუმლოება შეუძლებელია — ასეთი გარიგება კანონით დადგენილ მარეგულირებელი სტრუქტურის მრავალსაფეხურიან შემოწმებას გადის და საჯაროა.

შესაბამისად, „ტერაბანკისა“ და სასტუმრო „ბილტმორის“ გასხვისების პროცესთან ჩემი სახელის დაკავშირება სრულიად უსაფუძვლოა და „ტვ პირველის“ მხრიდან სიცრუის მორიგ ტირაჟირებას წარმოადგენს, - აცხადებს ჩხარტიშვილი.