ზელენსკი: ვიშნევოეში საბრძოლო მასალის საწყობი იყო, მტერმა ამ საწყობზე მიიტანა იერიში - ბევრი ადამიანი დაშავდა და დიდი დანაკარგია

უკრაინის პრეზიდენტმა, ვოლოდიმირ ზელენსკიმ განაცხადა, რომ კიევის ოლქის ქალაქ ვიშნევოეში რუსული თავდასხმის შედეგად აფეთქდა „უკრობორონპრომის“ ერთ-ერთი საწარმოს საბრძოლო მასალის საწყობი.

ამჟამად აღნიშნულ ფაქტზე აღძრულია სისხლის სამართლის საქმე და ასევე განხორციელდება თანამდებობიდან გათავისუფლებები.

„საშინელი სიტუაციაა. ვიშნევოეში საბრძოლო მასალის საწყობი იყო. მტერმა ამ საწყობზე მიიტანა იერიში. ბევრი ადამიანი დაშავდა და დიდი დანაკარგია“, - აღნიშნა უკრაინის ლიდერმა.

მან დასძინა, რომ უკვე მიიღო „სრული ინფორმაცია“ უკრაინის უსაფრთხოების სამსახურის, შინაგან საქმეთა სამინისტროსა და გენერალური პროკურორის ოფისისგან.

„აღძრულია სისხლის სამართლის საქმე. დამნაშავეები სისხლის სამართლის პასუხისგებაში მიეცემიან. და, რა თქმა უნდა, იქნება გათავისუფლებები „უკრობორონპრომში“, რადგან საწყობი „უკრობორონპრომის“ ერთ-ერთ საწარმოს ეკუთვნოდა“, - შეაჯამა პრეზიდენტმა.