ზელენსკი: ზამთრის დადგომამდე მოვლენების განვითარების ორი ვარიანტი არსებობს - რუსეთთან მოლაპარაკებების გზით ომის დასრულება ან საბრძოლო მოქმედებების გაფართოება რუსეთში შესაძლო მობილიზაციის ზრდით

უკრაინის პრეზიდენტმა, ვოლოდიმირ ზელენსკიმ განაცხადა, რომ ზამთრის დადგომამდე მოვლენების განვითარების ორი ვარიანტი არსებობს - რუსეთთან მოლაპარაკებების გზით ომის დასრულება ან საბრძოლო მოქმედებების გაფართოება რუსეთში შესაძლო მობილიზაციის ზრდით.

„ჩვენ ამ ზამთარს ორი გზა გვაქვს. პირველი გზა არის ის, რომ ვიპოვოთ შესაძლებლობა, დავსხდეთ რუსეთთან მოლაპარაკებების მაგიდასთან და დავასრულოთ ეს ომი. ეს პრიორიტეტია. ამაზე ვარ ფოკუსირებული. ჩვენ გვესმის, ვისთანაც გვაქვს საქმე. ამიტომ, ამის ალტერნატივა, რომელსაც ყოველთვის ეძებს არა უკრაინა, არამედ რუსეთი, არის ომის გაფართოება და მობილიზაციის გაძლიერება“, - აღნიშნა ზელენსკიმ.

„მე მივიღე სადაზვერვო მოხსენება და ვხედავთ, რომ პუტინის გარემოცვაში არიან ადამიანები, რომლებსაც სურთ ომის დასრულება, ხედავენ ეკონომიკურ კოლაფსს და ლოგისტიკურ კოლაფსს. მაგრამ არიან სამხედროებიც, რომლებსაც სურთ ომის გაფართოება და მობილიზაციის გაძლიერება. მათ ეს სურთ, სურთ ჩვენი მოკვლა. ამიტომ, ზამთრის გადატანის გეგმისთვის უნდა მოვემზადოთ“, - დასძინა მან.