შტატების სახაზინო დეპარტამენტში საგანგებო ბრიფინგისთვის ემზადებიან - ქვეყნის მთავარი საფინანსო ინსტიტუტი ირანის წინააღმდეგ დაანონსებული ეკონომიკური ომის სტრატეგიას გაახმოვანებს

მსოფლიო მედიის წარმომადგენლები ახლა შტატების სახაზინო დეპარტამენტში იკრიბებიან. რამდენიმე საათში უწყებაში საგანგებო ბრიფინგი გაიმართება - ქვეყნის მთავარი საფინანსო ინსტიტუტი ირანის წინააღმდეგ დაანონსებული ეკონომიკური ომის სტრატეგიას გაახმოვანებს. ვაშინგტონი სავაჭრო ბერკეტების, საერთაშორისო იზოლაციის ინსტრუმენტებისა და სანქციების გამოყენებას გეგმავს. მიზანია - თეირანმა შეიარაღებულ კონფლიქტში მარცხი აღიაროს.

"ირანი სრული კოლაფსის წინაშეა!!!", "ეკონომიკურ ბლოკადას გამანადგურებელი მასშტაბი ექნება - მიზანი ირანის მუხლებზე დაჩოქებაა" - გეგმის გასაჯაროებამდე, მის შესაძლო შედეგებზე დონალდ ტრამპი დღეს სოციალურ ქსელში მცირე გზავნილებს ავრცელებდა. ცნობილია, რომ თეთრი სახლი გეგმავს, თეირანთან ერთად, სანქციები დაუწესოს ყველა იმ სახელმწიფოს, ბანკს, გადამცვლელ პუნქტსა და ავიაკომპანიას, რომლებიც ირანის ნავთობის შეძენასა და ტრანსპორტირებას უწყობენ ხელს.

ვაშინგტონის მუქარას თეირანმა გაფრთხილებით უპასუხა. ირანის ხელისუფლება აცხადებს, რომ, თუ ამერიკის ეკონომიკური კამპანია გაგრძელდება, ისლამური რესპუბლიკა სპარსეთის ყურიდან ნავთობის ექსპორტს გააჩერებს. ომის მონაწილე მხარეებად და მტრებად გამოცხადდებიან ის ქვეყნებიც, რომლებიც აშშ-ის ეკონომიკურ ზომებს შეუერთდებიან.

მეზობელმა სახელმწიფოებმა და შტატების პარტნიორებმა ირანის დიპლომატიური უწყებიდან კიდევ ერთი გაფრთხილება მოისმინეს - საგარეო საქმეთა სამინისტროს სპიკერმა თქვა, რომ თეირანი უფლებას იტოვებს, დაარტყას იმ ობიექტებსა და ტერიტორიებს, რომლებიც ირანის წინააღმდეგ სამხედრო მოქმედებებისთვის გამოიყენება.

ახლო აღმოსავლეთში ირანს და შეერთებულ შტატებს შორის დაპირისპირება უკვე 90 დღეზე მეტია გრძელდება. შტატები განაგრძობს ირანული პორტების ბლოკადას, ირანი კი მსოფლიოს მთავარ ენერგეტიკულ დერეფანში სავაჭრო მიმოსვლის შეზღუდვას ცდილობს. მედიის ცნობით, ბოლო ორ დღეში ჰორმუზის სრუტეში ნაოსნობა თითქმის შეჩერდა. ეკონომიკური არტერია 20-ზე ნაკლებმა გემმა გადაკვეთა, რაც ომამდე არსებულ მაჩვენებელზე დაახლოებით 90%-ით ნაკლებია.

ავტორი: ლუკა ჩლაიძე