ზელენსკიმ დასავლელი პარტნიორები გააკრიტიკა იმის გამო, რომ უკრაინას ბალისტიკური რაკეტების ჩამოგდებისთვის საჭირო შეიარაღებას არ აწვდიან

უკრაინის პრეზიდენტმა ვოლოდიმირ ზელენსკიმ დასავლელი პარტნიორები გააკრიტიკა იმის გამო, რომ ისინი კიევს რუსული ბალისტიკური რაკეტების ჩამოგდებისთვის საჭირო შეიარაღებას დროულად არ აწვდიან.

„ბალისტიკური რაკეტების ჩამომგდები საშუალებები არის ის, რაც დღეს დაღუპული ადამიანების სიცოცხლეს გადაარჩენდა. ძალიან მნიშვნელოვანია, რომ პარტნიორებმა გაიგონ, რომ ანტიბალისტიკური საშუალებების მიწოდების დაყოვნებას ან მოუმზადებლობას მივყავართ ასეთ საშინელ მსხვერპლამდე და ნგრევამდე. პარტნიორებს, რომლებიც აქტიური დახმარებისთვის მზად არ არიან, შეუძლიათ დაგვეხმარონ ახალი სასანქციო ნაბიჯებით. რუსული ბალისტიკური რაკეტების წარმოების მნიშვნელოვანი ნაწილი დღემდე დასანქცირებული არ არის. საჭიროა ახალი ნაბიჯები „დიდი შვიდეულისგან“ და ევროკავშირისგან, ყველასგან, ვინც სიცოცხლის დაცვას უჭერს მხარს“, - დაწერა ზელენსკიმ „ტელეგრამის“ საკუთარ არხზე.

უკრაინის ლიდერი გამოეხმაურა აგრეთვე დღეს ღამე რუსეთის მიერ კიევსა და კიევის ოლქზე განხორციელებულ მასირებულ დაბომბვას. მისი განცხადებით, გვიან ღამით რუსეთის სარაკეტო თავდასხმის შედეგად დაღუპულთა რიცხვი 17-მდე გაიზარდა.

თავდაპირველად უკრაინული მედია 15 დაღუპულის შესახებ წერდა.

„ამ მომენტისთვის რუსეთის მიერ კიევსა და კიევის ოლქზე მასირებული სარაკეტო თავდასხმის შედეგად 44 დაშავებულის შესახებაა ცნობილი. კიდევ 17 ადამიანი, სამწუხაროდ, დაიღუპა. ვუსამძიმრებ ოჯახის წევრებსა და ახლობლებს. თავდასხმა მძიმე იყო: 22 ბალისტიკური რაკეტა, 4 „ცირკონი/ონიქსი“ და კიდევ 115 დრონი, რომელთა უმეტესობა რეაქტიული იყო. თავდასხმის ძირითად სამიზნეებს წარმოადგენდა სამოქალაქო საწარმოების სასაწყობო მეურნეობა, აგრეთვე იყო დარტყმები ინფრასტრუქტურაზე, რკინიგზის სადგურზე, ობიექტებზე, რომლებსაც ომთან კავშირი არ აქვთ: ლუდსახარში კომპანია, სამშენებლო მასალების საწყობები, სამოქალაქო ლოგისტიკა“, - დაწერა ზელენსკიმ.