ზელენსკიმ ნავროცკი უკრაინელების მიმართ სიძულვილის გაღვივებაში დაადანაშაულა

უკრაინისა და პოლონეთის პრეზიდენტებს შორის დიპლომატიური სკანდალი გრძელდება. ვოლოდიმირ ზელენსკიმ კაროლ ნავროცკის ცუდი პოლიტიკური დასასრული უწინასწარმეტყველა. დაპირისპირება ლიდერებს შორის პოლონეთის პრეზიდენტის მიერ უკრაინელი კოლეგისთვის „თეთრი არწივის ორდენის“ ჩამორთმევამ გააღრმავა. ზელენსკიმ ნავროცკი უკრაინელების მიმართ სიძულვილის გაღვივებაში დაადანაშაულა.

„არ შეიძლება ჩვენ და პოლონელები არ ვიყოთ პარტნიორები ან მეგობრები, იმიტომ, რომ მეზობლები ვართ. თუ პარტნიორი და მეგობარი არ ხარ, აბა ვინ ხარ? შემდეგ ეს, წლებისა და ათწლეულების განმავლობაში, გადადის იმაში, რაც ჩვენ რუსებთან გვაქვს - უპატივცემულობაში, აგრესიასა და საზოგადოების რადიკალიზაციაში. იმაში, რასაც ორბანი აკეთებდა, რომელიც სამხედროებს ჩვენს საზღვართან, თავის საზღვარზე აყენებდა. რისთვის იყო საჭირო ეს სიგნალები? ეს არის პოლიტიკური ბრძოლა, რომელიც შეიძლება ცუდად დასრულდეს. ძალიან ცუდი ესკალაციით. მე მიმაჩნია, რომ სიძულვილზე პოლიტიკური დივიდენდების დაგროვება არ შეიძლება“, - განაცხადა ზელენსკიმ.

ზელენსკის მხრიდან პოლონეთის პრეზიდენტის კრიტიკას პოლონელი პოლიტიკოსები ეხმიანებიან. სეიმის დეპუტატი იაცეკ სასინი მიიჩნევს, რომ კიევმა ვარშავასთან კონფრონტაციის გზა აირჩია. პოლონელმა ევროპარლამენტარმა, ევა ზაიაჩკოვსკა ჰერნიკმა კი ზელენსკის განგსტერი უწოდა და სოციალურ ქსელში დაწერა, რომ უკრაინის ადგილი ევროკავშირში არ არის.