ზელენსკის განცხადებით, რუსეთმა კიევში უკრაინის მეცნიერებათა აკადემიის შენობა დაბომბა

უკრაინის პრეზიდენტ ვოლოდიმირ ზელენსკის განცხადებით, რუსმა სამხედროებმა კიევში ქვეყნის ეროვნულ მეცნიერებათა აკადემიის შენობაზე იერიში მიიტანეს.

როგორც ზელენსკიმ „ტელეგრამის“ საკუთარ არხზე დაწერა, თავდასხმის შემდეგ შენობაში ხანძარი გაჩნდა. მაშველები ეძებენ ადამიანებს, რომლებიც, სავარაუდოდ, თავდასხმის მომენტში აკადემიის შენობაში იმყოფებოდნენ.

„რუსეთის იერიშის სამიზნე უკრაინის მეცნიერებათა ეროვნული აკადემიის შენობა გახდა. ამჟამად ადგილზე სამაშველო ოპერაცია მიმდინარეობს, მეხანძრეები ცეცხლს აქრობენ და ეძებენ ადამიანებს, რომლებიც შესაძლოა შენობაში იმყოფებოდნენ. ჩართულია ყველა შესაბამისი სამსახური“, - დაწერა ზელენსკიმ.

გარდა ამისა, როგორც ზელენსკიმ დაწერა, დღეს კიევში ასევე იერიში მიიტანეს ფარმაცევტულ კომპანიასა და ბენზინგასამართ სადგურებზე, დნიპროში - ბიზნესცენტრზე, სხვა ქალაქებსა და რეგიონებში კი სამოქალაქო ობიექტებზე, საწარმოებსა და საკომუნიკაციო ინფრასტრუქტურაზე.

ზელენსკის თქმით, არიან დაღუპულები და დაშავებულები.

„რუსეთი ამ თავდასხმებისთვის აუცილებლად მიიღებს პასუხს. უკრაინის თითოეულმა პარტნიორმა უნდა დაინახოს, რომ ამგვარი ტერორისა და დარტყმების ფონზე უკრაინის მხარდაჭერა, უპირველეს ყოვლისა, ადამიანების სიცოცხლის მხარდაჭერას ნიშნავს. ეს არის იმ პრინციპის მხარდაჭერა, რომ ტერორი არასდროს და არსად არ უნდა იქცეს ნორმად. რუსეთმა ამ ყველაფრისთვის პასუხი უნდა აგოს და რეალური შედეგები იგრძნოს“, - დასძინა მან.