ზვიად შალამბერიძე აშშ-ისა და საქართველოს ურთიერთობებზე: ვხედავთ, რომ ძალიან კონსტრუქციული დიალოგი მიმდინარეობს სხვადასხვა დონეზე, რაც საბოლოოდ, ჩვენს ორ ქვეყანას მიიყვანს იქამდე, რომ ჩვენი სტრატეგიული ურთიერთობა ისევ აღდგება

თუ ვინმე იყო ამ შემთხვევაში დამნაშავე იმ ჩვენი სტრატეგიული ურთიერთობების შეწყვეტისა, იყო ბაიდენის ადმინისტრაცია და ის ნაბიჯები, რომელიც წინა ადმინისტრაციის დროს იდგმებოდა ჩვენი ხელისუფლების წინააღმდეგ, - განაცხადა ზვიად შალამბერიძემ გადაცემაში „დღის ქრონიკა“.

რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველი მოადგილის თქმით, ბოლო პერიოდში საქართველოა და აშშ-ს შორის ურთიერთობის დინამიკა ნელ-ნელა გაიზარდა და შედეგად სახეზეა უმაღლეს დონეზე ვიზიტები. კერძოდ, აპრილის თვეში აშშ-ში რამდენიმე მინისტრი იმყოფებოდა. დღეს კი ამერიკის შეერთებული შტატების სახელმწიფო მდივნის თანაშემწის მოადგილე შეხვდა პრემიერსა და საგარეო საქმეთა მინისტრს.

„რეალურად სხვადასხვა დელეგაცია ჩამოვიდა სხვადასხვა მიმართულებით და შეხვედრებზე ხდება სხვადასხვა თემის განხილვა, რაც ცალსახად არის სწორი ნაბიჯები აშშ-ის მთავრობის მხრიდან, რადგან ჩვენ არაერთხელ განვაცხადეთ, რომ თუ ვინმე იყო ამ შემთხვევაში დამნაშავე იმ ჩვენი სტრატეგიული ურთიერთობების შეწყვეტისა, იყო ბაიდენის ადმინისტრაცია და ის ნაბიჯები, რომელიც წინა ადმინისტრაციის დროს იდგმებოდა ჩვენი ხელისუფლების წინააღმდეგ. დღევანდელ დღეს ვხედავთ, რომ ძალიან კონსტრუქციული დიალოგი მიმდინარეობს სხვადასხვა დონეზე, რაც საბოლოოდ, რა თქმა უნდა, ჩვენს ორ ქვეყანას მიიყვანს იქამდე, რომ ჩვენი სტრატეგიული ურთიერთობა ისევ აღდგება“, - აღნიშნა შალამბერიძემ.