რუსეთი სომხეთს გაზის მიწოდებას “დროებით” შეუზღუდავს - Netgazeti

რუსეთის ტერიტორიაზე დაგეგმილი პროფილაქტიკური და სარემონტო სამუშაოების გამო სომხეთისთვის ბუნებრივი გაზის მიწოდება დროებით შეწყდება. ამის შესახებ „გაზპრომ სომხეთი“ იტყობინება.

„რუსეთის ტერიტორიაზე, მაგისტრალურ გაზსადენზე „ჩრდილოეთ კავკასია – ამიერკავკასია“ კომპლექსური გეგმური პროფილაქტიკური და სარემონტო სამუშაოების გამო, 15-დან 25 სექტემბრის ჩათვლით აღნიშნული გაზსადენით სომხეთისთვის ბუნებრივი გაზის მიწოდება დროებით შეწყდება.

“აღნიშნულ პერიოდში რესპუბლიკის მომხმარებლების უწყვეტი და საიმედო გაზმომარაგება შეზღუდვების გარეშე განხორციელდება შიდა რეზერვებისა და ირანის ისლამური რესპუბლიკიდან (IRI) მოწოდებული ბუნებრივი გაზის დამატებითი მოცულობების ხარჯზე“, – ნათქვამია განცხადებაში.

სომხეთი რუსულ ბუნებრივ აირს საქართველოს ტერიტორიის გავლით იღებს. რუსეთიდან მომავალი ბუნებრივი აირი საქართველოს ტერიტორიას კვეთს (ჩრდილოეთ კავკასია – ამიერკავკასიის მაგისტრალური გაზსადენის მეშვეობით) და ასე მიეწოდება სომხეთს. გაზის მთავარი მიმწოდებელია რუსული სახელმწიფო კომპანია „გაზპრომი“. სომხეთის შიდა ბაზარზე კი მის განაწილებასა და რეალიზაციას კომპანია „გაზპრომ სომხეთი“ (რომელიც რუსული „გაზპრომის“ 100%-იანი შვილობილი კომპანიაა) ახდენს.

იმ შემთხვევებში, როდესაც გაზსადენზე სარემონტო სამუშაოები მიმდინარეობს, ტრანზიტი დროებით ჩერდება ხოლმე. ასეთ გამონაკლის სიტუაციებში ყოფილა პრეცედენტები, როცა სომხეთს რუსული გაზი დროებით სხვა ალტერნატიული მარშრუტით (მაგალითად, აზერბაიჯანის გავლით) მიუღია. რუსეთის გარდა, სომხეთი ბუნებრივი აირის გარკვეულ მოცულობას ირანიდანაც იღებს (ელექტროენერგიის სანაცვლოდ).

დაგვამატე Google-ში

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.წესებსა და პირობებს დეტალურად შეგიძლია გაეცნო მხარდაჭერის პლატფორმაზე.