აშშ-მა დაამტკიცა უკრაინისთვის „პატრიოტის“ 500 რაკეტის შესაძლო მიყიდვა - Netgazeti

ამერიკის შეერთებული შტატების სახელმწიფო დეპარტამენტმა დადებითი დასკვნა გასცა უკრაინისთვის Patriot-ის რაკეტების მიყიდვაზე.

სახელმწიფო დეპარტამენტის განცხადებით, დაამტკიცა უკრაინის მთავრობისთვის გაძლიერებული შესაძლებლობების PATRIOT-ის PAC-3 MSE რაკეტებისა და მათთან დაკავშირებული აღჭურვილობის შესაძენად. სავარაუდო საერთო ღირებულება 2.1 მილიარდი დოლარია, რომელიც მთლიანად პარტნიორებისა და მოკავშირეების მიერ დაფინანსდება.

„უკრაინის მთავრობამ მოითხოვა ხუთასი რაკეტის შეძენა. ასევე შევა შემდეგი არაძირითადი თავდაცვითი აღჭურვილობის ნივთები: PAC-3 MSE კლასიფიცირებული და არაკლასიფიცირებული სათადარიგო ნაწილები; და ლოჯისტიკისა და პროგრამული მხარდაჭერის სხვა დაკავშირებული ელემენტები. შემოთავაზებული გაყიდვა მხარს დაუჭერს შეერთებული შტატების საგარეო პოლიტიკისა და ეროვნული უსაფრთხოების მიზნებს პარტნიორი ქვეყნის უსაფრთხოების გაუმჯობესებით, რომელიც ევროპაში პოლიტიკური და ეკონომიკური სტაბილურობის განმაპირობებელი ძალაა“, — აცხადებს სახელმწიფო დეპარტამენტი.

უკრაინა შესყიდვის ხარჯებს დაფარავს კანადის, გერმანიისა და ნორვეგიის შემოწირულებებით JUMPSTART პროგრამის მეშვეობით და ეროვნული სახსრებით, რომლებიც დაფინანსებულია ევროკავშირის უკრაინის მხარდაჭერის სესხით. აშშ-ის ფინანსური მონაწილეობა გათვალისწინებული არ არის.

„შემოთავაზებული გაყიდვა გააუმჯობესებს უკრაინის შესაძლებლობებს, გაუმკლავდეს მიმდინარე და მომავალ საფრთხეებს მისი ინტეგრირებული საჰაერო და სარაკეტო თავდაცვის შესაძლებლობების გაუმჯობესების გზით. შემოთავაზებული გაყიდვის შედეგად აშშ-ის თავდაცვის მზადყოფნაზე უარყოფითი გავლენა არ იქნება“, — აცხადებს სახელმწიფო დეპარტამენტი.

უკრაინის პრეზიდენტი ვოლოდიმირ ზელენსკი მიესალმა გადაწყვეტილებას, თუმცა აღნიშნა, რომ მიწოდება შესაძლოა რამდენიმე წლის განმავლობაში არ დაიწყოს.

„PAC-3-ის 500 რაკეტა საკმაოდ დიდი რაოდენობაა და ძალიან მალე, უკვე ამ ზამთარს შეუძლია შექმნას უაღრესად ეფექტიანი თავდაცვის სისტემა. თუმცა, განსაზღვრულია, რომ მიწოდება მხოლოდ რამდენიმე წლის შემდეგ შეიძლება დაიწყოს. ჩვენ ჩვენს ამერიკელ პარტნიორებს ვთხოვთ, იპოვონ გამოსავალი იმ პერიოდისთვის, როდესაც PAC-3-ის ჩამჭრელი რაკეტების გამოყენების რეალური საფრთხე და რეალური საჭიროება იარსებებს“, — განაცხადა ზელენსკიმ.

ის ვაშინგტონს სთხოვს, უკრაინას ზამთრის მხარდაჭერის პაკეტი მიაწოდონ — თვეში 100 Patriot-ის ჩამჭრელი რაკეტის ოდენობით.

ზელენსკის თქმით, შეერთებულ შტატებს, ევროპელ პარტნიორებსა და მსოფლიოს სხვა ქვეყნებს საწყობებში PAC-3-ის ჩამჭრელი რაკეტების საკმარისი მარაგები აქვთ. მათი უკრაინისთვის ახლავე, 2026–2027 წლების ზამთარში გადაცემა, ხოლო არსენალების შევსება მოგვიანებით, იმ წარმოების ფარგლებში, რომლის შეკვეთაც და საფასურის გადახდაც უკვე უკრაინასა და მის პარტნიორებს აქვთ უზრუნველყოფილი, სწორი მიდგომა იქნებოდა.

დაგვამატე Google-ში

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.წესებსა და პირობებს დეტალურად შეგიძლია გაეცნო მხარდაჭერის პლატფორმაზე.