ახალი სამართლებრივი მექანიზმები და ისეთი კანონების მიღება, რომლებიც დაიცავს ქვეყნის იდენტობას - საინიციატივო ჯგუფი ეკლესიის, ისტორიული გმირებისა და ეროვნული ფასეულობების დაცვის მიზნით კონსულტაციებს იწყებს იურისტებთან, სამართლის სპეციალისტებთან და ისტორიკოსებთან, რათა შეიქმნას შესაბამისი საკანონმდებლო ბაზა.

პარტიის "ერთიანი ნეიტრალური საქართველოს" წევრის, გელა ნიკოლაიშვილის განცხადებით, ეროვნული ღირებულებები თუ იქნება დაცული ისე, რომ არ ეწინააღმდეგებოდეს არც სამართლებრივ ჩარჩოებს და არც ქვეყნის კონსტიტუციას მისაღები იქნება.

"ეს ღირებულებები თუ იქნება დაცული საკანონმდებლო დონეზე და ისე, რომ ის არ შეეწინააღმდეგება არც საერთაშორისო ნორმებს, არც კონსტიტუციას და არც ნებისმიერ კანონმდებლობას, რა თქმა უნდა, მისაღები იქნება.

ყველა იურისტის ვალია, რომ სამართლებრივ ჩარჩოებში მოაქციოს ეს ყველაფერი და ამაში დახმარება აღმოუჩინოს საინიციატივო ჯგუფს", - განაცხადა გელა ნიკოლაიშვილმა.