აშშ-ში სტიქიას ებრძვიან - ინდიანაში 10-მდე ადამიანი დაიღუპა, ჰავაიზე კი ქარიშხალმა "ლალამ" მძიმე ვითარება შექმნა | Rustavi2

10-მდე დაღუპული და ასობით ევაკუირებული ადამიანი - აშშ-ის ინდიანის შტატში შტორმებსა და წყალდიდობას ებრძვიან. შტატში საგანგებო მდგომარეობაა გამოცხადებული.

გარდაცვლილთა შორის 4 წლის ბავშვია, რომელიც ჯენინგსის ოლქში, ძლიერი შტორმის დროს დაიღუპა მას შემდეგ, რაც მის სახლს ხე დაეცა. შესაბამისი უწყებების ინფორმაციით, დაღუპულთა შორის ასევე არიან 19 წლის მამაკაცი და 58 წლის ქალი.

შტატის გუბერნატორის ინფორმაციით, განსაკუთრებით რთული ვითარება ინდიანაპოლისის რაიონში იყო, სადაც საგანგებო სამსახურებმა წყალდიდობის გამო ათობით ადამიანის ევაკუაცია განახორციელეს. მაიკ ბრაუნის თქმით, მან შექმნილი ვითარების შესახებ აშშ-ის პრეზიდენტს მიაწოდა ინფორმაცია, რის შემდეგაც დონალდ ტრამპი შტატისთვის ფედერალური დახმარების გამოყოფას დათანხმდა.

სტიქიის გამო ინდიანაში ელექტროენერგიის გარეშე დაახლოებით 150 000 აბონენტი რჩება. საგანგებო სიტუაციების მართვის დეპარტამენტში აცხადებენ, რომ წყალდიდობა უახლოესი 24 საათის განმავლობაში კვლავ სერიოზულ პრობლემად დარჩება.

სტიქიას ებრძვიან ჰავაიშიც, სადაც კუნძულებს პირველი კატეგორიის ქარიშხალი "ლალა" დაატყდა თავს. დაღუპულია ერთი ადამიანი, დაშავებულია დაახლოებით 10 მოქალაქე.

ქარიშხალ "ლალას" სიჩქარემ საათში 120 კილომეტრს მიაღწია. ეს ჰავაის კუნძულებზე ქარიშხლის პირველი პირდაპირი დარტყმაა ბოლო 34 წლის განმავლობაში. სტიქიას ძლიერი შტორმიც მოჰყვა, რის შედეგადაც გზები და ინფრასტრუქტურა მნიშვნელოვნად დაზიანდა.

სტიქიის გამო 190 ფრენა გადაიდო, 60 000-ზე მეტი აბონენტი კი ელექტროენერგიის გარეშე დარჩა. გუბერნატორის განცხადებით, ვითარება კრიტიკულია.

სინოპტიკოსების პროგნოზით, სტიქია ჰავაის კუნძულებზე მომდევნო დღეებშიც გაგრძელდება. ადგილობრივი ხელისუფლება მოსახლეობას სიფრთხილისკენ მოუწოდებს.