მმართველი გუნდისთვის დავით საყვარელიძის განცხადება "ნაციონალური მოძრაობის" ღალატის კიდევ ერთი აღიარებაა. ყოფილმა პროკურორმა აგვისტოს ომზე ისაუბრა და თქვა, რომ საქართველოს სახელმწიფოებრიობის დაკარგვამდე ნახევარი ნაბიჯი ჰქონდა დარჩენილი. სახელისუფლებო პარტიის შეფასებით, ყოფილი მაღალჩინოსნები, წლებია, გარე დავალებებს ასრულებენ და სამშობლოს ინტერესების წინააღმდეგ მოქმედებენ.
"ნაციონალური მოძრაობის" ყოფილმა მაღალჩინოსანმა, დავით საყვარელიძემ 2008 წლის აგვისტოს ომის მოვლენებზე იაგო ხვიჩიას გადაცემაში ისაუბრა. თქვა, რომ ომის პირველ დღეებში რუსეთიც მოუმზადებელი იყო, საქართველო კი მაშინ, საყვარელიძის თქმით, უდიდესი საფრთხის წინაშე იდგა. გაიხსენა დევი ჭანკოტაძის სატელეფონო ზარებიც, როცა გენერალი მას ტექნიკას სთხოვდა.
საყვარელიძის განცხადებას საპარლამენტო პოლიტიკური ჯგუფი "ხალხის ძალა" ყველა იმ დანაშაულის აღიარებად აფასებს, რომელიც, პოლიტიკოსების თქმით, "ნაციონალურმა მოძრაობამ", აგვისტოს ომთან დაკავშირებით ჩაიდინა. მმართველ გუნდში კი აქცენტს ყოფილი ხელისუფლების მოღალატეობრივ და ანტისახელმწიფოებრივ ქმედებებსა და განცხადებებზე აკეთებენ.
როგორ გადაურჩა საქართველო სახელმწიფოებრიობის დაკარგვას 2008 წლის აგვისტოს ომში - დავით საყვარელიძემ იაგო ხვიჩიას გადაცემაში აღიარა, რომ ქვეყანა მოუმზადებელი იყო და უდიდესი საფრთხის წინაშე იდგა. ინტერვიუს გავრცელების შემდეგ, "ნაციონალური მოძრაობის" ყოფილ მაღალჩინოსანს დამატებითი განმარტება აღარ გაუკეთებია. კომენტარზე უარს ამბობენ მისი ყოფილი თანაპარტიელები.
რუსთავი 2
წყარო: rustavi2.ge