საერთაშორისო საზღვაო ორგანიზაციის გენერალური მდივანი: მნიშვნელოვანია საქართველოს აქტიური მონაწილეობა შუა დერეფნის განვითარებაში, ამ ხიდის შექმნაში დასავლეთსა და აღმოსავლეთს შორის

"ჩემთვის დიდი პატივია დავბრუნდე საქართველოში და მონაწილეობა მივიღო ამ საერთაშორისო საზღვაო ფორუმში. საქართველო არის არა მხოლოდ საზღვაო ქვეყანა, არამედ, ქვეყანა, რომელიც ძალიან დიდ მნიშვნელობას ანიჭებს ადამიანურ ელემენტს, განსაკუთრებით მეზღვაურების თვალსაზრისით", - განაცხადა საერთაშორისო საზღვაო ორგანიზაციის გენერალურმა მდივანმა, არსენიო დომინგესმა ბათუმში საქართველოს მესამე საერთაშორისო საზღვაო ფორუმის გახსნის ცერემონიაზე სიტყვით გამოსვლისას.

როგორც IMO-ს გენერალურმა მდივანმა აღნიშნა, საქართველო საერთაშორისო საზღვაო ორგანიზაციის წევრია 1993 წლიდან და მას შემდეგ აქტიურად მონაწილეობს მის მუშაობაში.

მან განსაკუთრებული აქცენტი გააკეთა საქართველოს მნიშვნელოვან როლზე შუა დერეფნის განვითარების პროცესში.

"ჩვენ ვიდეოში ვიხილეთ, რომ 7 მილიარდი დოლარის ინვესტიცია ხდება პორტში, ინფრასტრუქტურაში. ის ფაქტი, რომ 20%-ზე მეტად იზრდება ტვირთების დამუშავება, უკვე მიმდინარე წელს მოხდა ეს ზრდა - როდესაც მსოფლიოში პრობლემებია, საშუალებას გვაძლევს, დავინახოთ, რამდენად მნიშვნელოვან როლს თამაშობს დაკავშირებადობა მულტიმოდალურ ტრანსპორტირებაში საქართველოდან და რეგიონიდან, სადაც გადაზიდვა ძალიან მნიშვნელოვანია. ასევე მნიშვნელოვანია საქართველოს აქტიური მონაწილეობა შუა დერეფნის განვითარებაში, ამ ხიდის შექმნაში დასავლეთსა და აღმოსავლეთს შორის", - განაცხადა IMO-ს გენერალურმა მდივანმა.

სიტყვით გამოსვლისას არსენიო დომინგესმა საერთაშორისო საზღვაო სექტორში არსებულ გლობალურად მნიშვნელოვან მიმართულებებზე, საზღვაო მმართველობის მთავარ საკითხებზე და გამოწვევებზე ისაუბრა, მათ შორის სხვადასხვა რეგიონში არსებულ გეოპოლიტიკურ ვითარებაზე გააკეთა აქცენტი.

"შემდეგი რამდენიმე წლის განმავლობაში 40 000 კვალიფიცირებული მეზღვაურის დეფიციტი გვექნება და ეს მიმართულება საქართველოს თვალსაზრისით, გაიზრდება 20 000 მეზღვაურის მიწოდებით მსოფლიო მასშტაბით. კიდევ ერთხელ მადლობა მინდა გადავუხადო საქართველოს. ეს გახლავთ მე-10 წელი, რაც ეს ფორუმი ტარდება, გაგვიზიარეთ თქვენი გამოცდილება იმის თვალსაზრისით, თუ ყოველ წელს როგორ ახორციელებთ ახალგაზრდა ნიჭიერი ხალხის ჩართულობას მეზღვაურის პროფესიაში და ინარჩუნებთ არა მხოლოდ კარგ ურთიერთობებს მსოფლიო საზღვაო ორგანიზაციასთან, არამედ ყველა რეგიონალურ პარტნიორთან და ასევე მათ გარეთ", - განაცხადა IMO-ს გენერალურმა მდივანმა.