გერმანიის შინაგან საქმეთა მინისტრმა საფრანგეთში მიმდინარე არეულობებზე პასუხისმგებლობა "მემარცხენე ექსტრემისტებსა" და მიგრანტებს დააკისრა

გერმანიის შინაგან საქმეთა მინისტრმა, ალექსანდერ დობრინდტმა საფრანგეთში, საპროტესტო აქციების ფონზე მომხდარ არეულობებში პასუხისმგებლობა "მემარცხენე ექსტრემისტებსა" და მიგრანტებს დააკისრა.

"ყველა, ვინც პირდაპირ არ საუბრობს იმ ფაქტზე, რომ მემარცხენე ექსტრემისტები და მიგრანტების გარკვეული ჯგუფები ქუჩებში ერთიანდებიან დემოკრატიული სისტემის წინააღმდეგ საბრძოლველად, ვერ ხვდება სიტუაციას", - განაცხადა კონსერვატორმა დობრინდტმა.

გერმანიის შინაგან საქმეთა მინისტრმა საფრანგეთის ქუჩებში მომხდარი ძალადობა მკაცრად დაგმო.

"ისინი, ვინც ქუჩებს ბრძოლის ველად აქცევენ, პოლიციელებს თავს ესხმიან და ადმინისტრაციულ შენობებს ცეცხლს უკიდებენ, უკეთესი განათლების მოთხოვნით არ გამოდიან - ისინი შეიარაღებულ ბრძოლას აწარმოებენ ჩვენი თავისუფალი საზოგადოების და ცხოვრების წესის წინააღმდეგ", - განაცხადა დობრინდტმა.

საფრანგეთში უკვე რამდენიმე კვირაა საპროტესტო გამოსვლები მიმდინარეობს. პროტესტი მოსწავლეებმა დაიწყეს, რომლებიც უკმაყოფილონი იყვნენ მასწავლებლების ნაკლებობითა და სკოლებში არსებული მძიმე მდგომარეობით. საფრანგეთის პოლიციას დემონსტრაციების დროს ძალის გადამეტებულ გამოყენებაში ადანაშაულებენ.

მოგვიანებით, საპროტესტო მოძრაობას საზოგადოების სხვა ჯგუფებიც შეუერთდნენ, რის შედეგადაც ვითარება კიდევ უფრო გამწვავდა. შაბათ-კვირას, საფრანგეთში ცხოვრების მაღალი გაძვირების წინააღმდეგ გამართულ საყოველთაო საპროტესტო აქციებს თან ახლდა არეულობა და ძარცვა. შექმნილი ვითარების საპასუხოდ, პრემიერ-მინისტრმა სებასტიან ლეკორნიუმ ცალკეულ ტერიტორიებზე ადგილობრივი კომენდანტის საათის დაწესების შესახებ განაცხადა.

საფრანგეთის მთავრობამ არეულობების ორგანიზებაში პასუხისმგებლობა მემარცხენე პოლიტიკურ წრეებს დააკისრა, თუმცა მიგრანტები პირდაპირ არ დაუდანაშაულებია.

ხელისუფლების წარმომადგენლების განცხადებით, არეულობის შემდეგ გარეუბნებიდან ქალაქის ცენტრალურ ნაწილებში ახალგაზრდა მამაკაცები ჩავიდნენ, რათა მაღაზიები გაეძარცვათ.