ორი ათეული წლის შემდეგ თბილისში ტრამვაი დაბრუნდება - იდეა უკვე ხელშეკრულებად და კონკრეტულ სამშენებლო პროექტად იქცა

ტრამვაის ძველი ისტორია 20 წლის წინ დასრულდა. ნომერი მე-12 მარშრუტი იყო ის სატრანსპორტო ხაზი, რომელიც ყველაზე ბოლოს გაუქმდა. ის დიდუბეს ზემო ავჭალასთან აკავშირებდა. ორი ათეული წლის შემდეგ, სწორედ აქედან იწყება რელსებზე მოძრავი ტრანსპორტის ისტორიის ახალი თავიც. ტრამვაის დაბრუნების იდეა უკვე ხელშეკრულებად და კონკრეტულ სამშენებლო პროექტად იქცა.

დოკუმენტებს ხელი საკრებულოს შენობაში მოეწერა. ტრამვაის ახალი ხაზის პროექტირებას და მშენებლობას თურქული ერთობლივი საწარმო განახორციელებს, რომელიც სამ გამოცდილ კომპანიას აერთიანებს. თურქულ კონსორციუმს შესრულებული აქვს ისეთი მსხვილი პროექტები, როგორიცაა სტამბოლის მეტროს გვირაბების სარკინიგზო ხაზების მოწყობა.

დიდი დიღმიდან დიდუბემდე 11 გაჩერება იქნება. პროექტი მოიცავს ტრამვაის დეპოს მშენებლობასაც. დეპოში აშენდება მთავარი და საევაკუაციო შესასვლელ-გასასვლელები, მოეწყობა ყველა საჭირო საინჟინრო კომუნიკაციის ქსელი და სისტემა. ხაზის მშენებლობის პარალელურად, გამოცხადდება ტენდერი 10 ერთეული ტრამვაის შემადგენლობის შესყიდვაზე.

ტრამვაის ხაზის მოწყობის შედეგად, დიდი დიღმის დასახლება ქალაქის ცენტრს დაუკავშირდება. გაიზრდება ხელმისაწვდომობა საზოგადოებრივ ტრანსპორტთან, რაც მგზავრებისთვის გადაადგილებას უფრო კომფორტულს გახდის.