"სად არიან ის ევროპარლამენტარები, რომლებიც თბილისში ჩამოდიოდნენ და ძალადობას მხარდაჭერას უცხადებდნენ?" - გიორგი გაბუნია
ევროპაში მიმდინარე მასშტაბური არეულობებისა და ანტისამთავრობო აქციების ფონზე, მმართველი გუნდი კიდევ ერთხელ საუბრობს დასავლეთის მხრიდან ორმაგ სტანდარტზე. "ქართული ოცნების" წევრების განცხადებით, როცა საფრანგეთის, ბელგიისა და იტალიის ქალაქების მსგავსი მოვლენები თბილისის ცენტრში ვითარდებოდა, საქართველოს ხელისუფლების ნაბიჯები ევრობიუროკრატიამ ანტიდემოკრატიულად შეაფასა.
ბრიუსელი, რომელიც თბილისში სახელმწიფო ინსტიტუტებზე თავდასხმის დროს მაინც ხელისუფლებას აკრიტიკებდა, ახლა ტირანაში განვითარებულ ანალოგიურ მოვლენებს მკაცრად გმობს.
პარლამენტის კულტურის კომიტეტის თავმჯდომარის, გიორგი გაბუნიას განცხადებით, 2025 წლის 4 ოქტომბერს თბილისში გამართული ძალადობრივი აქციის მონაწილეებმა სკვერები და კერძო ბიზნესები დააზიანეს, თუმცა, მისი თქმით, ამ ფაქტებზე ევროპელი პოლიტიკოსებისა და ევროპარლამენტარების მხრიდან შეშფოთება არ გამოხატულა.
"საქართველოში ზუსტად ანალოგიურ პროცესებში, მაშინ, როდესაც 4 ოქტომბრის ღამეს ძალადობრივი აქციის მონაწილეებმა დააზიანეს სკვერები, დააზიანეს, მათ შორის, კერძო ბიზნესები, ერთი განცხადებაც კი ვერ ვნახეთ ამასთან დაკავშირებით ან შეშფოთების ან აღშფოთების. სად არიან ახლა ის პოლიტიკოსები, სად არიან ის ევროპარლამენტარები, რომლებიც ჩამოდიოდნენ თბილისში და მხარდაჭერას უცხადებდნენ ძალადობას, მხარდაჭერას უცხადებდნენ იმ ანტიდემოკრატიულ, ანტიკონსტიტუციურ პროცესებს?" - აცხადებს პარლამენტის კულტურის კომიტეტის თავმჯდომარე გიორგი გაბუნია.
რუსთავი 2
წყარო: rustavi2.ge