დიღმის მასივში კიდევ ერთი რეკრეაციული სივრცე მოეწყო

დიდუბის რაიონის გამგეობამ დიღმის მასივის მე-3 კვარტლის N6 ა, ბ, გ და ვ კორპუსების მიმდებარედ 4 000 კვ.მ ფართობის ტერიტორიის რეაბილიტაცია განახორციელა.

დასრულებულ სამუშაოებს დედაქალაქის მერი კახა კალაძე მერის მოადგილე კახა აბულაძესთან ერთად გაეცნო.

მისი თქმით, საცხოვრებელ კორპუსებს შორის არსებული სივრცეების მოწესრიგება და გამწვანება მომავალშიც აქტიურად გაგრძელდება, აღნიშნული პროექტი კი გაფართოვდება.

"დიღმის მასივში კიდევ ერთი ძალიან კარგი პროექტი განხორციელდა. ეს არის საცხოვრებელ კორპუსებს შორის არსებული სივრცის მოწესრიგება, განახლება, რეაბილიტაცია. პროექტის ფარგლებში მოეწყო დასასვენებელი პავილიონები, ბავშვებისთვის გაკეთდა ატრაქციონები, დაირგო ხე-მცენარეები. ასევე, საფეხბურთო მოედანს ჩაუტარდა რეაბილიტაცია. ტერიტორია მოწესრიგებულია, განათებული და სასიამოვნო გარემოა შექმნილი. ჩვენ დაგეგმილი გვაქვს აღნიშნული პროექტის გაგრძელება. ირგვლივ ძალიან ბევრი საცხოვრებელი კორპუსია. არსებობს სივრცეები, რომელთა გამწვანება, რეაბილიტაცია შესაძლებელია, რათა, პირველ რიგში, აქ მცხოვრებ ადამიანებს ჰქონდეთ დასვენების, ვარჯიშის, განტვირთვის შესაძლებლობა. შესაბამისად, პროექტი გაფართოვდება და კიდევ უფრო მეტი რეკრეაციული სივრცე შეიქმნება", - აღნიშნა თბილისის მერმა.

პროექტის ფარგლებში განხორციელდა მოძველებული ინფრასტრუქტურის დემონტაჟი, მოეწყო საფეხმავლო ბილიკები და დამონტაჟდა თანამედროვე გარე განათების სისტემა. ასევე, ტერიტორიაზე განთავსდა სპორტული ზონა, დამონტაჟდა საპარკო ინვენტარი, მოეწყო ტროტუარი და საპარკინგე სივრცე.

ადგილზე დედაქალაქის მერთან ერთად დიდუბის რაიონის გამგებელი დავით გელოვანი და საკრებულოს მაჟორიტარი დეპუტატი შოთა ქევხიშვილი იმყოფებოდნენ.