ქართველი მოდელის წარმატება ლეგენდარულ შოუზე - მატილდა გვარლიანი "ვიქტორია სიქრეტის" პოდიუმზე

გაზაფხულის მოტივები, მკვეთრი ფერები და შთამბეჭდავი ფრთები - ბელა ჰადიდმა "ვიქტორია სიქრეტის" წლევანდელ შოუს პირველივე გამოჩენისთანავე განსაკუთრებული ენერგია შესძინა. სუპერმოდელმა პოდიუმი ყვავილებით გაფორმებული და ბუნებით შთაგონებული ნეონის მწვანე სამოსით გახსნა.

შოუ, რომელიც გრანდიოზული ფრთებით, ექსტრავაგანტური კოსტიუმებითა და ვარსკვლავური შემადგენლობით გამოირჩევა, მოდა, მუსიკა და სანახაობა გააერთიანა. პოდიუმზე ერთმანეთს ცნობილი მოდელები და მომღერლები ენაცვლებოდნენ.

განსაკუთრებული ყურადღების ცენტრში კი კაილი ჯენერის დებიუტი და 50 მილიონ დოლარად შეფასებული ე.წ. "ფენტეზი ბრა" აღმოჩნდა - სამოსი, რომელიც 4 410 ბრილიანტითა და 75-კარატიანი ყვითელი ბრილიანტით იყო მორთული. კოსტიუმის დამზადებაში 15 ადამიანი 1 000 საათის განმავლობაში მუშაობდა.

კაილი ჯენერისთვის ეს "ვიქტორია სიქრეტის" მოდის ჩვენებაში პირველი მონაწილეობა იყო.

შოუ, რომელსაც მილიონობით მაყურებელი მოუთმენლად ელოდება, პოდიუმზე არ იწყება. ვიდრე მოდელები სცენაზე გამოჩნდებიან, კულისებში არანაკლებ საინტერესო და დაძაბული პროცესი მიმდინარეობს - მზადება იმ რამდენიმე წუთისთვის, რომელმაც მთელი მსოფლიოს ყურადღება უნდა მიიპყროს.

"ვიქტორია სიქრეტის" პოდიუმი ძნელად წარმოსადგენია ადრიანა ლიმას გარეშე. ბრაზილიელი მოდელი ბრენდის ერთ-ერთი ყველაზე ცნობილი და გამორჩეული სახეა.

მისი გამოცდილება, თავდაჯერებულობა და გამორჩეული სცენური მანერა იმ ეპოქას გვახსენებს, რომელმაც "ვიქტორია სიქრეტის" ჩვენება გლობალურ სანახაობად აქცია.

უკვე მესამედ მიიღო მონაწილეობა ქართველმა მოდელმა მატილდა გვარლიანმა. ის კვლავ რჩება პირველ და ერთადერთ ქართველად, ვინც ამ ლეგენდარულ შოუზე წარსდგა.

ცნობილ სახეებს შორის ასევე იყვნენ: ირინა შეიკი, ჯიჯი ჰადიდი, ელზა ჰოსკი, კენდის სვეინპოლი, ეშლი გრეჰემი და სხვები.

წლევანდელ შოუში მხოლოდ ქალი მომღერლები მონაწილეობდნენ. ღონისძიების მუსიკალური ნაწილი მეგან მორონიმ, ტეიტ მაკრეიმ და სხვა არტისტებმა გააფორმეს.

ნიუ-იორკში ჩატარებული წინა ორი ჩვენების შემდეგ, ბრენდმა ღონისძიება რამდენიმეწლიანი პაუზის შემდეგ კვლავ "ანგელოზების ქალაქში" დააბრუნა. ლოს-ანჯელესმა ღონისძიებას 18 ოქტომბერს უმასპინძლა.

ვარსკვლავებით, ექსტრავაგანტური კოსტიუმებითა და მუსიკალური ნომრებით გამორჩეულ ღონისძიებას ცნობილი სტუმრები დაესწრნენ.

ჩვენება გრანდიოზულად, პოდიუმზე 21-ე გამოსვლით, ლეგენდარულმა ადრიანა ლიმამ დახურა.