მედია: ფრიდრიხ მერცის განცხადებით, გერმანიის მომდევნო პრეზიდენტი ქალი უნდა იყოს
გერმანიის კანცლერი ფრიდრიხ მერცი მხარს უჭერს, რომ, ფრანკ-ვალტერ შტაინმაიერის შემდეგ, გერმანიის პრეზიდენტი ქალი გახდეს.
"პარტიას შევთავაზებ შეთანხმებულ კანდიდატურას - კანდიდატს პოლიტიკური ცენტრიდან", - განაცხადა მერცმა ბერლინში, ქრისტიან-დემოკრატიული კავშირის (CDU) ადგილობრივი ორგანიზაციების ხელმძღვანელებთან გამართულ დახურულ შეხვედრაზე. ამის შესახებ შეხვედრის მონაწილეებმა მედიას განუცხადეს.
"მტკიცედ ვარ დარწმუნებული, რომ ეს ქალი უნდა იყოს", - ამის შესახებ, წყაროების ცნობით, მერცმა განაცხადა.
ცნობისთვის, გერმანიის ფედერალური პრეზიდენტი სახელმწიფოს ოფიციალური მეთაურია. ეს თანამდებობა განსხვავდება კანცლერის პოსტისგან, რადგან კანცლერი მთავრობას მეთაურობს.
ამჟამინდელი პრეზიდენტი შტაინმაიერი, რომელიც წარსულში სოციალ-დემოკრატიული პარტიის (SPD) საგარეო საქმეთა მინისტრი იყო, პრეზიდენტის თანამდებობაზე 2017 წელს აირჩიეს. მისი მეორე საპრეზიდენტო ვადა 2027 წლის მარტში დასრულდება.
ბავარიის პრემიერ-მინისტრმა მარკუს ზიოდერმა ცოტა ხნის წინ პრეზიდენტობის კანდიდატად თავისი პარტიის, ქრისტიან-სოციალური კავშირის (CSU) წარმომადგენელი, ილზე აიგნერი წარადგინა.
თუმცა, თავად ქრისტიან-დემოკრატიულმა კავშიმა შესაძლოა ალტერნატიული კანდიდატი საკუთარი რიგებიდან დაასახელოს. ამ კონტექსტში, რამდენიმე ქალის სახელი განიხილება: იულია კლეკნერი - ბუნდესტაგის ამჟამინდელი თავმჯდომარე; კარინ პრიენი - ოჯახის საკითხთა მინისტრი და ანეგრეტ კრამპ-კარენბაუერი - CDU-ის ყოფილი ლიდერი და თავდაცვის ყოფილი მინისტრი.
რუსთავი 2
წყარო: rustavi2.ge