1-ელი სექტემბრიდან თავშესაფრის პროცედურებში ცვლილებები შედის - შს მინისტრის ბრძანება
„თავშესაფრის პროცედურის დამტკიცების შესახებ“ საქართველოს შინაგან საქმეთა მინისტრის №115 ბრძანებაში ცვლილებები შევიდა.
განისაზღვრა, რომ 1-ელი სექტემბრიდან უცხოელი ან მოქალაქეობის არმქონე პირი თავშესაფრის მაძიებლად არ მიიჩნევა მისთვის საქმის შეწყვეტის გადაწყვეტილების კანონით დადგენილი წესით ჩაბარების დღიდან და მასზე არ ვრცელდება არგაძევების პრინციპი. შესაბამისად, გადაწყვეტილების უცხოელისთვის ან მოქალაქეობის არმქონე პირისთვის ჩაბარების მომენტიდან დასაშვებია მისი საქართველოდან გაძევება ან ექსტრადიცია.
ახალი რედაქცია ითვალისწინებს განხილვის ტიპის სწრაფ განსაზღვრას - ანკეტირების დასრულებიდან 5 სამუშაო დღის ვადაში მიგრაციის სამმართველოს უფროსი ვალდებულია დეპარტამენტის დირექტორს წარუდგინოს ოფიციალური პატაკი, რომელიც განსაზღვრავს განმცხადებლის საქმე წავა დაჩქარებული წესით (თუ აშკარად დაუსაბუთებელია) თუ ჩვეულებრივი (სტანდარტული) პროცედურით. ასევე, ცვლილება ითვალისწინებს შემთხვევებს, როდესაც შესაბამისი საფუძვლის არსებობისას ანკეტირება აღარ ტარდება.
ამასთან, თავშესაფრის მაძიებლის ცნობის მიღებასთან დაკავშირებული ცვლილებით, თავშესაფრის მაძიებლის ცნობის მისაღებად უცხოელი ან მოქალაქეობის არმქონე პირი პირადად უნდა გამოცხადდეს დეპარტამენტში.
BM.GE
წყარო: bm.ge