2-მილიარდიანი „ჩრდილოვანი იპოთეკა“ - ოთარ ნადარაია უცხოურ ვალუტაში შიდა განვადებების რისკებზე
საბანკო იპოთეკური სესხების ლარიზაციის ფონზე, ბოლო წლებში საქართველოს უძრავი ქონების ბაზარზე ალტერნატიულმა, „ჩრდილოვანმა“ მიმართულებამ - დეველოპერების შიდა განვადებებმა იჩინა თავი.
ეკონომისტ ოთარ ნადარაიას თქმით, ამ ბაზარმა არაოფიციალური მონაცემებით უკვე 2 მილიარდ ლარს მიაღწია, თუმცა ეს პროდუქტი თითქმის სრულად უცხოურ ვალუტაში იყიდება.
ეკონომისტი განმარტავს, რომ შიდა განვადება შინაარსობრივად იგივე სესხია. შესაბამისად, როდესაც მოქალაქეს შემოსავალი ლარში აქვს, უცხოურ ვალუტაში შიდა განვადების აღება მისთვის ზუსტად ისეთივე მაღალრისკიანი ნაბიჯია, როგორც დოლარში იპოთეკური სესხი.
„იპოთეკური სესხები ლარშია, თუმცა მივიღეთ პრობლემური რეალობა, - პარალელური ბაზარი შიდა განვადებების სახით, რაც დაახლოებით 2 მილიარდს აღწევს. შიდა განვადება უცხოურ ვალუტაშია.
თუ ადამიანს ხელფასი ლარში აქვს, ვალუტაში განვადების აღება მისთვის ისეთივე რისკია, როგორც დოლარში იპოთეკური სესხი.
ინდიკატორი იმისა, არის თუ არა უძრავი ქონება ზედმეტად გაძვირებული, არის ის გაძვირდა თუ არა უძრავი ქონება ბევრად უფრო მეტად, ვიდრე ყველაფერი დანარჩენი. საქართველოში ბინის ფასი ლარში უფრო მეტად გაძვირდა, ვიდრე სამომხმარებლო ფასები. ეს საყურადღებო ინდიკატორია, თუმცა წითელს არ ანათებს ისე, როგორც 2005–2008 წლებში ან საბერძნეთში მოხდა,“ - განმარტავს ნადარაია.
BM.GE
წყარო: bm.ge