საუდის არაბეთის ენერგოობიექტებზე ჰუსიტების თავდასხმის შემდეგ ნავთობის ფასი გაიზარდა

იემენელი ჰუსიტების მიერ საუდის არაბეთის უმსხვილეს ნავთობგადასამუშავებელ ქარხანაზე იერიშის მიტანის შესახებ გავრცელებული ცნობების ფონზე, ოთხშაბათს საერთაშორისო ბაზარზე ნავთობის ფასი გაიზარდა.

კერძოდ, Brent-ის მარკის ნავთობის დეკემბრის ფიუჩერსების ფასი 1%-ით გაიზარდა და ბარელზე $115.03 შეადგინა, WTI-ის კონტრაქტების ღირებულებამ კი 1.6%-ით მოიმატა და $101.51-ს მიაღწია.

ANZ Research-ის ანალიტიკოსების შეფასებით, დიპლომატიური მოლაპარაკებების პერსპექტივამ ბაზარზე გაყიდვების ტალღა ვერ გამოიწვია, რადგან ტრეიდერები ყურადღებას უშუალოდ ადგილზე არსებულ ვითარებაზე ამახვილებენ. მათი განმარტებით, ნედლი ნავთობის მიწოდებასთან დაკავშირებული რისკები კვლავ იზრდება.

ჰუსიტების განცხადებით, მათ სამშაბათს საუდის არაბეთის აღმოსავლეთ პროვინციაში მდებარე რას-ტანურის ნავთობგადასამუშავებელ ქარხანაზე ბალისტიკური რაკეტით იერიში მიიტანეს. პარალელურად, საუდის არაბეთის მეთაურობით მოქმედმა სამხედრო კოალიციამ განაცხადა, რომ საჰაერო თავდაცვის სისტემებმა აღმოსავლეთ პროვინციისკენ გაშვებული სამი ბალისტიკური რაკეტა და ქვეყნის სამხრეთ რეგიონისკენ მიმართული ოთხი დრონი გაანადგურა.

ამასთან, სამეფოს სამოქალაქო თავდაცვის სამსახურმა კიდევ ერთი მოგერიებული იერიშის შედეგად მიყენებული ზიანის შესახებ განაცხადა. აღსანიშნავია, რომ თავად საუდის არაბეთის ხელისუფლებას ნავთობგადასამუშავებელ ქარხანაზე თავდასხმის ან ობიექტის დაზიანების ფაქტი ოფიციალურად არ დაუდასტურებია.

ცნობისთვის, რას-ტანურის ნავთობგადასამუშავებელი ქარხნის სიმძლავრე დღე-ღამეში 550,000 ბარელს შეადგენს. ეს საწარმო საუდის არაბეთის ნედლი ნავთობის ერთ-ერთ მთავარ საექსპორტო კვანძში მდებარეობს.