2025 წელს გამარტივებულ შესყიდვებზე მთავრობამ ₾1.14 მილიარდი დახარჯა

სახელმწიფო შესყიდვების სააგენტომ 2025 წლის საქმიანობის ანგარიში გამოაქვეყნა, რომელშიც გასულ წელს მთავრობის და მუნიციპალიტეტების მიერ გამოცხადებული ტენდერების და გამარტივებული შესყიდვების შესახებ ინფორმაცია არის წარმოდგენილი. დოკუმენტის თანახმად, გასულ წელს გამარტივებულ შესყიდვებზე, ანუ ისეთ ხელშეკრულებებზე, რომლებიც ტენდერის გარეშე, ერთ პირთან მოლაპარაკების შედეგად შედგა, ჯამში 1.14 მილიარდი ლარი დაიხარჯა, რაც 2024 წელთან შედარებით 5.8%-ით არის შემცირებული.

მთლიანობაში სახელმწიფო შესყიდვების მოცულობა 6.4 მილიარდ ლარს შეადგენდა, აქედან, 4,547,554,328 ლარის (71.25%) შესყიდვა განხორციელდა ღია ელექტრონული პროცედურების/ტენდერების საშუალებით, 718,988,460 ლარი (11.25%) ღია ელექტრონული კონსოლიდირებული (ცენტრალიზებული შესყიდვების) ტენდერებით, ხოლო 1,114,108,591 ლარი (17.5%) გამარტივებული შესყიდვების მეშვეობით განხორციელდა.

გამარტივებული შესყიდვები კატეგორიების მიხედვით ასე ნაწილდება - 652 მილიონი ლარი წარმოადგენდა ტიპიურ გამარტივებულ შესყიდვებს, 232 მილიონი ლარი იყო სასოფლო-სამეურნეო სექტორში პირდაპირი სუბსიდიები (მევენახეებისგან ყურძნის შესყიდვა); 201 მილიონი ლარი იყო გამარტივებული შესყიდვები საქონლისა და მომსახურების შესაძენად; 29 მილიონი ლარი კი იყო გამარტივებული შესყიდვები სამშენებლო სამუშაოების შესაძენად.

რაც შეეხება გაფორმებული ხელშეკრულებების მიხედვით, უმსხვილეს შესყიდველებს, თანხობრივად პირველ ადგილზეა საქართველოს საავტომობილო გზების დეპარტამენტი 78 დადებული ხელშეკრულებით, რომლების ჯამურმა ღირებულებამ 562 მილიონ ლარს გადააჭარბა. მეორე და მესამე პოზიციებს ქალაქ თბილისის მერია 205,356,669 ლარითა (დადებული ხელშეკრულებების რაოდენობა 237) და საქართველოს მუნიციპალური განვითარების ფონდი 176,002,117 ლარით (დადებული ხელშეკრულების რაოდენობა 52) იკავებენ.