2027 წლიდან WizzAir-ის ფლოტი Starlink-ის ინტერნეტით აღიჭურვება

Wizz Air-მა Starlink-თან Wi-Fi-ის შეთანხმება დააანონსა, რომლის თანახმადაც 2027 წლიდან მთელი მისი ფლოტი სატელიტური ინტერნეტით აღიჭურვება. ამით კომპანია ევროპული გადამყვანების იმ ჯგუფს უერთდება, რომლებმაც ეს ტექნოლოგია უკვე დანერგეს.

აღსანიშნავია, რომ აქამდე ეს ტექნოლოგია ბაზრის ბიუჯეტურ სეგმენტს, როგორც წესი, არ მოიცავდა.

"ულტრადაბალბიუჯეტური მოგზაურობა ყოველთვის გულისხმობდა შესაძლებლობებზე მეტი ადამიანისთვის ხელმისაწვდომობას. 2027 წელს ეს ფილოსოფია კოსმოსურ ეპოქაში გადაგვაქვს," - განაცხადა იან მალინმა, Wizz Air-ის მთავარმა კომერციულმა დირექტორმა.

Eurowings-ი, რომელიც ასევე დაბალბიუჯეტიანი მოდელით ოპერირებს, წლის ბოლოსთვის Starlink-ის დანერგვას ასევე გეგმავს. ეს იმ ჯგუფური შეთანხმების ნაწილია, რომელიც მისმა მშობელმა კომპანიამ, Lufthansa Group-მა დააანონსა.

უნგრულ ავიაკომპანიას შეთანხმების ფინანსური დეტალები არ გაუსაჯაროებია და არც ის დაუდასტურებია, სერვისი უფასო იქნება თუ ფასიანი დამატება.

ეს განცხადება კეთდება იმ ფონზე, როდესაც SpaceX-ი (Starlink-ის მშობელი კომპანია) Nasdaq-ზე დებიუტისთვის ემზადება, ხოლო სატელიტური ინტერნეტის პროვაიდერი საავიაციო სფეროში თავისი გავლენის არეალის სწრაფ გაფართოებას აგრძელებს.

Starlink-მა უკვე გააფორმა ხელშეკრულებები აშშ-ის რამდენიმე ავიაკომპანიასთან, მათ შორის American Airlines-თან, Southwest-თან, United-სა და Alaska Airlines-თან, ასევე შორ მანძილზე მფრენ ოპერატორებთან - Singapore Airlines-სა და Emirates-თან.

ევროპაში სერვისი პირველად ლატვიურმა გადამზიდავმა airBaltic-მა 2025 წლის თებერვალში გაუშვა, რასაც მოჰყვა Air France, SAS და British Airways.

აზიაში, სამხრეთკორეულმა Hanjin Group-მა (რომელიც Korean Air-ს, Asiana Airlines-სა და სამ ბიუჯეტურ ავიაკომპანიას მოიცავს) Starlink-თან შეთანხმება 2025 წლის დეკემბერში დააანონსა. სერვისის დანერგვა 2026 წლის მესამე კვარტალიდან არის მოსალოდნელი.

კონკურენტმა ბიუჯეტურმა ავიაკომპანიებმა, Ryanair-მა და EasyJet-მა, ამ ეტაპზე თავი შეიკავეს. Ryanair-ის აღმასრულებელმა დირექტორმა მაიკლ ო'ლირიმ სერვისის დანერგვა ჯერჯერობით გამორიცხა და მიზეზად ინსტალაციის ხარჯები, საწვავის მოხმარების ზრდა და მათი ფრენების საშუალო ხანგრძლივობის სიმცირე დაასახელა.

EasyJet-მა Starlink-თან მოლაპარაკებები გამართა, თუმცა აცხადებს, რომ ეკონომიკური თვალსაზრისით ეს ჯერ კიდევ არ არის მოგებიანი.

Wizz Air-ის ფინანსური შედეგები 2026 ფისკალური წლისთვის, რომელიც 31 მარტს დასრულდა, ხუთშაბათს, 11 ივნისს უნდა გამოქვეყნდეს. ავიაკომპანიის განცხადებით, სრული წლის განმავლობაში ის მოელის, რომ ან დანახარჯებს დაფარავს (break even), ან მცირე მოგებაზე გავა.