2027 წლისთვის BYD ექსპორტზე 2.5 მილიონი ავტომობილის გატანას გეგმავს

ჩინურმა ელექტრომობილების მწარმოებელმა BYD-მა 2027 წელს საზღვარგარეთ გასაყიდი ტრანსპორტის მოცულობა 2.5 მილიონ ერთეულამდე გაზარდა.

ინფორმაცია Deutsche Bank-მა და Citi-მ კომპანიის ხელმძღვანელობასთან გამართული შეხვედრის შემდეგ გაავრცელეს. Deutsche Bank-ის ანგარიშის მიხედვით, ავტომწარმოებელმა 2026 წლის საექსპორტო პროგნოზიც გაზარდა და ის 1.9-2 მილიონ ავტომობილს შეადგენს. ცნობისთვის, ეს მონაცემი გასული წლის მაჩვენებელთან შედარებით თითქმის გაორმაგებულ მოცულობას ნიშნავს.

მნიშვნელოვანია ითქვას, რომ საერთაშორისო გაყიდვების ზრდას BYD-ი სატვირთო გემების ფლოტის გაფართოებითა და საზღვარგარეთ წარმოების განვითარებით გეგმავს. უნგრეთში მდებარე ქარხანაში ავტომობილების აწყობა დეკემბერამდე დაიწყება.

ამას გარდა, გერმანული ბანკის ინფორმაციით, ჩინური გიგანტი საერთაშორისო საწარმოო სივრცეების დამატების შესაძლებლობასაც განიხილავს. ადგილობრივი წარმოება კომპანიას ევროკავშირის 27%-იანი და ბრაზილიის 34%-იანი საიმპორტო ტარიფების თავიდან არიდებაში დაეხმარება. Citi-ის შეფასებით, ეს ნაბიჯი თითოეულ ავტომობილზე 40 000 იუანზე ($5 961) მეტ დანაზოგს უზრუნველყოფს და ახალი საწარმოო ხაზების გაშვების ხარჯებს დააბალანებს.