4 თვეში აგროსასურსათო პროდუქციის ექსპორტი $577 მილიონამდე გაიზარდა - კობახიძის ანგარიში

საქართველოდან აგროსასურსათო პროდუქციის ექსპორტი მზარდია. 2026 წლის იანვარ-აპრილში საქართველოდან მსოფლიოს 92 ქვეყანაში ექსპორტირებულია 577 მილიონი აშშ დოლარის ღირებულების აგროსასურსათო პროდუქცია.

სამთავრობო პროგრამის შესრულებაზე მოხსენების თანახმად, მაჩვენებელია წლიურად 13.6%-ით არის გაზრდილი.

ანგარიშში აღნიშნულია, რომ 2026 წლის პირველი ოთხი თვის მონაცემებით, საქართველოდან ევროკავშირის ქვეყნებში აგროსასურსათო პროდუქციის ექსპორტის ღირებულებამ 84 მილიონი აშშ დოლარი შეადგინა, რაც 2025 წლის შესაბამისი პერიოდის მაჩვენებელზე 37%-ით მეტია.

აღსანიშნავია, რომ 2025 წელს საქართველოდან მსოფლიოს 110 ქვეყანაში ექსპორტირებულია რეკორდული 1.8 მილიარდი აშშ დოლარის ღირებულების აგროსასურსათო პროდუქცია, რაც 2024 წლის მაჩვენებელს აღემატება 10%-ით. ევროკავშირში აგროსასურსათო პროდუქციის ექსპორტის მაჩვენებელმა, 2025 წლის მონაცემებით, 245 მილიონი აშშ დოლარი შეადგინა და წლიურად 36%-ით გაიზარდა.

აღსანიშნავია, რომ აგროსასურსათო პროდუქციის ექსპორტში მოწინავე ყურძნის ნატურალური ღვინოები და სპირტიანი სასმელებია.

2025 წელს საქართველოდან ექსპორტირებულია 550 მილიონი აშშ დოლარის ღირებულების ღვინო და სპირტიანი სასმელები. მსოფლიოს 71 ქვეყანაში ექსპორტირებულია 90 მილიონამდე ლიტრი, 268 მილიონი აშშ დოლარის ღირებულების ღვინო. მსოფლიოს 55 ქვეყანაში ექსპორტირებულია 41 მილიონი ლიტრი სპირტიანი სასმელი. სპირტიანი სასმელების ექსპორტიდან შემოსავლების სახით მიღებულია 282 მილიონ აშშ დოლარამდე.

2026 წლის პირველ კვარტალში კი ქართული ღვინისა და ალკოჰოლური სასმელების ექსპორტში ზრდის ტენდენცია ფიქსირდება. მსოფლიოს 51 ქვეყანაში ექსპორტირებულია 17,3 მლნ ლიტრი ღვინო, რომლის ღირებულება 53,2 მლნ აშშ დოლარს შეადგენს. გასული წლის ანალოგიურ პერიოდთან შედარებით, ექსპორტირებული ღვინის რაოდენობა 5%-ით, ხოლო ღირებულება 7%-ით გაიზარდა.