40-ზე მეტი ქართული კომპანიისთვის შეიძლება რუსეთის ბაზარი ჩაიკეტოს… სია მზარდია - ბიზნესმენი მამუკა ფიფია

რუსეთისა და საქართველოს ორმაგი მოქალაქის, ბიზნესმენ მამუკა ფიფიას ინფორმაციით, არსებობს ქართული კომპანიების სია, რომლებსაც, შესაძლოა, უახლოეს მომავალში რუსეთში ექსპორტი აიკრძალოთ. როგორც მან BMG-სთან განაცხადა, სია მზარდია და სავარაუდოა, რომ აკრძალვა წელს ამოქმედდება. ბიზნესმენის თანახმად, ეს არის კომპანიები, რომლებიც აფინანსებენ ანტირუსულ საქმიანობას საქართველოში.

მამუკა ფიფიამ, რომელიც საქართველოში რეგისტრირებული პრორუსული პარტია “სოლიდარობა მშვიდობისთვის” საერთაშორისო მდივანია, საკითხზე თავდაპირველად სოციალურ ქსელში დაწერა და „სოლოვიოვ ლაივის“ ეთერში ისაუბრა.

ამასთან, ბიზნესმენმა "რადიო თავისუფლებასთან" განმარტა, რომ “ასაკრძალ” კომპანიებს, რომელთა რაოდენობა 40-ზე მეტია და მზარდია, ბრალი ედებათ რუსოფობიასა და ანტირუსული საქმიანობის სპონსორობაში.

მისი განცხადებით, სიაში შედიან ალკოჰოლური პროდუქციის (ღვინისა და კონიაკის მწარმოებლები/მომწოდებლები), მათ შორის მინერალური წყლების, გაზიანი სასმელების და ლუდის, ასევე თხილეულისა და მშრალი ნარევების მიმწოდებლები. ბიზნესმენმა BMG-სთან აღნიშნა, რომ სიას ასევე დაემატა ლოგისტიკური კომპანიები.

BMG შეეცდება გაარკვიოს, აქვს თუ არა მთავრობას და საქართველოს საგარეო უწყებას საკითხზე ინფორმაცია.

საქართველოდან რუსეთში ექსპორტი მზარდია - რას და რამდენს ვყიდით|5 წლის ტენდენცია