8 თვეში ბათუმში 11 ათასამდე ბინა გაიყიდა, ზრდა 4%-ია | Galt & Taggart

2026 წლის 8 თვეში ბათუმში 10 883 ბინა გაიყიდა, ეს წლიურად 3.6%-ით გაზრდილი მაჩვენებელია.

Galt & Taggart-ის ინფორმაციით, გაყიდვების ზრდას ხელი შეუწყო ახალი მასშტაბური პროექტების დაწყებამ და როგორც ადგილობრივი, ისე უცხოელი მყიდველების მხრიდან გაზრდილმა მოთხოვნამ. რეალურ დროში დინამიკის ამსახველ მეორად ბაზარზე გაყიდვები 12%-ით გაიზარდა (5 459 ბინა). რაც შეეხება პირველად ბაზარს, სადაც საჯარო რეესტრის მონაცემებში ტრანზაქციები დაგვიანებით აისახება, გაყიდვების რაოდენობამ 5 424 ბინა შეადგინა. თუმცა დეველოპერების გამოკითხვის მიხედვით, რომელიც პირველადი ბაზრის ტენდენციებს რეალურ დროში ზომავს, გაყიდვები წლიურად 30%-ით არის გაზრდილი.

2026 წლის აგვისტოში, პირველად ბაზარზე კვადრატული მეტრის საშუალო ფასმა (მზა ბინებისთვის) 1 986 დოლარს მიაღწია, რაც წლიურად 11% ზრდაა. ამასთან, მეორადი ბაზრის ახალ პროექტებში საშუალო ფასი წლიურად 7%-ით გაიზარდა და 1 614 დოლარი შეადგინა. ბაზრებს შორის არსებული ფასთა სხვაობა, მშენებარე პროექტების დიდი მოცულობა და ქირის ამონაგების ეტაპობრივი შემცირება შესაძლოა პირველადი ბაზრის ფასების ამ ტემპით ზრდისთვის შემზღუდავ ფაქტორად იქცეს.

რაც შეეხება ქირას, ბათუმში საშუალო დღიური განაკვეთი (ADR) 2026 წელს მეტწილად უცვლელი დარჩა და 38.4 დოლარი შეადგინა (აგვისტოს პიკურ პერიოდში საშუალოდ $53.7). უძრავი ქონების ფასების ზრდის პირობებში, ქირის საშუალო ამონაგები (Yield) 7.1%-მდე შემცირდა (2025 წლის 7.7%-დან). თუმცა ეს ნიშნული შესადარის ქალაქებს შორის კვლავ ერთ-ერთი ყველაზე მაღალია.