აჭარაში 13 400 ყალბი დოლარის გასაღების ბრალდებით უცხო ქვეყნის მოქალაქე დააკავეს

ფინანსთა სამინისტროს საგამოძიებო სამსახურის ცნობით, ჩატარებული ოპერაციის შედეგად, ამოღებულია 13 400 აშშ დოლარის ნომინალური ღირებულების ყალბი ბანკნოტები.

გამოძიების ვერსიით, ბრალდებული, უკანონო მატერიალური სარგებლის მიღების მიზნით, აჭარის ტერიტორიაზე ყალბ 50- და 100-დოლარიან კუპიურებს ასაღებდა. საქმის მასალების თანახმად, მან ჯამში 231 ყალბი ბანკნოტი გაასაღა. მათ შორის 194 ცალი 50-დოლარიანი და 37 ცალი 100-დოლარიანი.

საგამოძიებო მოქმედებების შედეგად, სამართალდამცველებმა ყალბი კუპიურები სრულად ამოიღეს.

საქმეზე გამოძიება საქართველოს სისხლის სამართლის კოდექსის 212-ე მუხლით მიმდინარეობს, რაც ყალბი ფულის დამზადებას ან გასაღებას გულისხმობს.