აჭარაში, ვეტერინარულ კლინიკაში „ოთხი თათი“ ვადაგასული ვეტერინარული პრეპარატი აღმოჩნდა - სეს
აჭარაში, ვეტერინარულ კლინიკაში „ოთხი თათი“ ვადაგასული ვეტერინარული პრეპარატი გამოვლინდა. შემთხვევა მას შემდეგ დაფიქსირდა, რაც შინაური ცხოველების ჯანმრთელობის დაცვისა და უსაფრთხო გარემოს უზრუნველყოფის მიზნით, სურსათის ეროვნული სააგენტო ვეტერინარული მიმართულებით კონტროლს ქვეყნის მასშტაბით გეგმურად ახორციელებდა.
სურსათის ეროვნული სააგენტოს ინფორმაციით, აჭარის დეპარტამენტის ინსპექტორებმა არაგეგმური შემოწმება განახორციელეს ინდივიდუალური მეწარმე ზ. გ.-ის კუთვნილ ვეტერინარულ კლინიკაში „ოთხი თათი“, რომელიც ქ. ბათუმში, მელიქიშვილის ქუჩა N22-ზე მდებარეობს. სახელმწიფო კონტროლის ფარგლებში ობიექტზე ვადაგასული ვეტერინარული პრეპარატი გამოვლინდა.
სურსათის ეროვნული სააგენტო ვეტერინარულ კლინიკებში, ვეტაფთიაქებსა და ზოომაღაზიებში სახელმწიფო ზედამხედველობას უწყვეტ რეჟიმში ახორციელებს, რათა უზრუნველყოფილი იყოს სერვისების უსაფრთხოება და დადგენილი რეგულაციების დაცვა.
სააგენტო მოუწოდებს მომხმარებლებს, ნებისმიერი დარღვევის ან საეჭვო ფაქტის აღმოჩენის შემთხვევაში დაუყოვნებლივ დაუკავშირდნენ გარემოს დაცვისა და სოფლის მეურნეობის სამინისტროს ცხელ ხაზს - 1501.
BM.GE
წყარო: bm.ge