ADB მზადაა, ირანის ომით დაზარალებულ წყნარი ოკეანის ქვეყნებს $70 მილიარდი გამოუყოს

აზიის განვითარების ბანკმა წყნარი ოკეანის რეგიონის იმ ქვეყნებს, სადაც ახლო აღმოსავლეთში მიმდინარე ომის გამო საწვავის დეფიციტი შეიქმნა, დახმარება აღუთქვა. ორგანიზაციის პრეზიდენტმა, მასატო კანდამ აღნიშნა, რომ ეს სახელმწიფოები კონფლიქტის გავლენის მიმართ განსაკუთრებით მოწყვლადები არიან. არსებული ინფორმაციით, ADB მზად არის პარტნიორებს ენერგეტიკული საჭიროებების დაკმაყოფილებაში ოპერატიულად დაეხმაროს.

ბანკმა წარადგინა $70 მილიარდის ღირებულების პროგრამა, რაც 2035 წლამდე აზია-წყნარი ოკეანის რეგიონში ენერგეტიკული და ციფრული ინფრასტრუქტურის გაფართოებას ითვალისწინებს.

მნიშვნელოვანია ითქვას, რომ ორგანიზაციის პროგნოზით, წყნარი ოკეანის ქვეყნების ეკონომიკური ზრდის ტემპი 2026 წელს 2.8%-მდე შემცირდება და ამის მთავარი გამომწვევი ფაქტორი სწორედ ირანის ომია. შედარებისთვის, გასულ წელს აღნიშნული მაჩვენებელი 4.2% შეადგენდა. როგორც კანდამ განაცხადა, ამ პროექტის მიზანია, წყნარი ოკეანის ქვეყნებს საგარეო შოკებისადმი ეკონომიკური მდგრადობის გაზრდაში შეუწყოს ხელი.

აღსანიშნავია, რომ ბანკის ამჟამინდელი სტრატეგია ენერგიის წყაროების დივერსიფიკაციასა და გრძელვადიან განვითარებაზეა ორიენტირებული. როგორც ირკვევა, რეგიონის ქვეყნებს ენერგეტიკული უსაფრთხოების გასამყარებლად ფინანსურ მხარდაჭერასთან ერთად ტექნიკურ დახმარებასაც გაუწევენ. მასატო კანდას თქმით, იგი მზად არის მხარი დაუჭიროს ყველა იმ ინიციატივას, რაც რეგიონის დამოუკიდებლობას განამტკიცებს.

შეგახსენებთ, რომ აზია-წყნარი ოკეანის რეგიონის ეკონომიკური გამოწვევები და განვითარების პერსპექტივები ADB-ის პრეზიდენტმა ქვეყნების ლიდერებთან ერთად რიგით 59-ე ყოველწლიურ შეხვედრაზე, უზბეკეთის ქალაქ სამარყანდში განიხილა.