
"ადგილზე 150-მდე მეხანძრე-მაშველია მობილიზებული" - საგანგებო სიტუაციების მართვის სამსახური
ქვემო ფონიჭალაში, საცხოვრებელ კორპუსში მომხდარი აფეთქების შედეგად ჩამონგრეული შენობის ნანგრევებში 7 ადამიანს ეძებენ. შემთხვევის ადგილზე 150-მდე მეხანძრე-მაშველია მობილიზებული. ამის შესახებ საგანგებო სიტუაციების მართვის სამსახურის უფროსმა თემურ მღებრიშვილმა მედიასთან განაცხადა.
მისი განმარტებით, შენობის ნგრევის საფრთხის გამო მაშველებს ძებნა-შველის ღონისძიების დროებით შეჩერება მოუწიათ. ამ დროისთვის სამუშაოები შენობის მეორე მხრიდან გრძელდება.
„ამ დროისთვის შემთხვევის ადგილზე 150-მდე მეხანძრე-მაშველია მობილიზებული. გარკვეული პერიოდის განმავლობაში შევწყვიტეთ ძებნა-შველის ღონისძიება, ვინაიდან ნგრევის საფრთხე იყო და ამ წუთშიც რჩება, თუმცა შენობის მეორე მხრიდან გავაგრძელეთ სამუშაოები.
4 ადამიანია გადაყვანილი სამედიცინო დაწესებულებაში. სულ 7 ადამიანს ვეძებთ. ძებნა-შველის ღონისძიება 7 ადამიანის ირგვლივ მიმდინარეობს“, - განაცხადა თემურ მღებრიშვილმა.
შეგახსენებთ, რომ ქვემო ფონიჭალაში, „უსინათლოთა დასახლებაში“, ხუთსართულიან საცხოვრებელ კორპუსში დილით აფეთქება მოხდა, რის შედეგადაც შენობის ნაწილი და სადარბაზო ჩამოინგრა. შინაგან საქმეთა მინისტრის ინფორმაციით, აფეთქების მიზეზი მეხუთე სართულზე გაზის გამათბობლის ჩართვა გახდა.
BM.GE
წყარო: bm.ge