
გადაიხედება თუ არა DRG-ის ტარიფები? - მინისტრის პასუხი
ჯანდაცვის მინისტრი, მიხეილ სარჯველაძე ამბობს, რომ მზადაა მოისმინოს შესაბამისი დასაბუთება და საჭიროების შემთხვევაში, DRG-ის ტარიფების გადახედვისთვის მზადაა. მან ამის შესახებ ჟურნალისტებს განუცხადა.
სექტორის წარმომადგენლები მიიჩნევენ, რომ ქვეყანაში მოქმედი DRG დაფინანსების მოდელი ეკონომიკურ გამოწვევებსა და ინფლაციურ პროცესებს ვეღარ პასუხობს და აუცილებელია ტარიფების გადახედვის მექანიზმის დანერგვა, რათა სამედიცინო მომსახურების ანაზღაურება ადეკვატური იყოს.
მინისტრის თქმით, პრიორიტეტი პაციენტისთვის უკეთესი ხარისხის სამედიცინო მომსახურების შეთავაზებაა.
"ცალკეულ სერვისების განახლების და ცვლილებების შესაძლებლობა ყოველთვის არსებობს, თუმცა ეს არ შეიძლება იყოს თვითმიზანი არც ჩვენთვის, არც კლინიკებისთვის. პრიორიტეტია, რომ DRG-ის პროცესში პირველ რიგში საყურადღებო იყოს მიწოდებული სამედიცინო სერვისის ხარისხი. სადაც აუცილებლობა იქნება და დასაბუთდება, რომ არის საჭიროება რაიმე ცვლილების ფასთა რეგულირების მიმართულებით, ბუნებრივია სამინისტრო მზად არის მოისმინოს. მზად ვარ, რომ ნებისმიერი წინადადება მოვისმინო არა უბრალოდ ფასის ზრდასთან დაკავშირებით, არამედ პირობები იმასთან დაკავშირებით, თუ როგორ შეიძლება, ხარისხი გაიზარდოს. ამის კვალდაკვალ, ნებისმიერი გადაწყვეტილებისთვის მზად ვართ, ოღონდ ეს პაციენტის საუკეთესო ინტერესებისთვის უნდა იყოს გამოყენებული", - ამბობს მინისტრი.
სამედიცინო მომსახურების ანაზღაურებაში დიაგნოზთან შეჭიდული ჯგუფების სისტემა DRG - ჯანდაცვის სამინისტრომ საყოველთაო ჯანდაცვის პროგრამის ეფექტურობის გასაზრდელად 2022 წლის ნოემბრიდან დაინერგა. რეფორმა მიზნად ისახავდა ჯანდაცვის სექტორში ხარჯების მართვის, გამჭვირვალობისა და მომსახურების ხარისხის გაუმჯობესებას. ჯანმრთელობის ეროვნული სააგენტოს 2024 წლის ანგარიშში წერს, რომ რეფორმამ ხელი შეუწყო პაციენტების თანაგადახდების წილის მნიშვნელოვან შემცირებას - საშუალოდ, 27%-დან 12%-მდე. მათივე ცნობით, DRG სისტემის დანერგვამ, გააძლიერა ჯანდაცვის ხარჯების გაზომვის შესაძლებლობა.
BM.GE
წყარო: bm.ge