ადიგენსა და წალკაში კორუფციის ფაქტებზე 3 პირი დააკავეს, მათ შორის მერის 2 წარმომადგენელია

ფინანსთა სამინისტროს საგამოძიებო სამსახურმა ორ სხვადასხვა მუნიციპალიტეტში კორუფციული ფაქტები გამოავლინა. უწყების ინფორმაციით, დაკავებულია სამი პირი, მათ შორის მუნიციპალიტეტის მერის ორი წარმომადგენელი.

გამოძიების დეტალები დღეს გამართულ ბრიფინგზე საგამოძიებო სამსახურის უფროსის მოადგილემ, ია ახალაიამ გაასაჯაროვა.

პირველი შემთხვევა ადიგენის მუნიციპალიტეტში გამოვლინდა. გამოძიების ვერსიით, სოფელ ზანავის ადმინისტრაციულ ერთეულში მერის წარმომადგენელმა, შუამავლის მეშვეობით, მოქალაქეს ქრთამის სახით 10 000 აშშ დოლარი გამოსძალა.

უწყების ცნობით, საჯარო მოხელე აღნიშნულ თანხას სახელმწიფო საკუთრებაში არსებულ მიწის ნაკვეთებზე საკემპინგე სივრცის მოწყობაში მფარველობის სანაცვლოდ ითხოვდა. სამართალდამცავებმა მერის წარმომადგენელთან ერთად ქრთამის აღებაში დახმარების ფაქტზე ერთი მოქალაქეც დააკავეს.

საქმეზე გამოძიება სისხლის სამართლის კოდექსის 338-ე მუხლით მიმდინარეობს (ქრთამის აღება), რაც სასჯელის სახით 7-დან 11 წლამდე ვადით თავისუფლების აღკვეთას ითვალისწინებს.

მეორე კორუფციული ფაქტი წალკის მუნიციპალიტეტში დაფიქსირდა. აქ საგამოძიებო სამსახურმა სამების ადმინისტრაციულ ერთეულში მერის წარმომადგენელი დააკავა.

გამოძიების თანახმად, საჯარო მოხელე 1 000 ლარის სანაცვლოდ ყალბ დოკუმენტებს ამზადებდა. კერძოდ, მან გასცა ცნობა 20 ტონა კარტოფილის ადგილწარმოშობის შესახებ, რაც რეალობას არ შეესაბამებოდა. ბრალდებული უშუალოდ დანაშაულის ჩადენის დროს აიყვანეს.

აღნიშნულ ეპიზოდზე კანონი 6-დან 9 წლამდე პატიმრობას ითვალისწინებს. ორივე საქმეზე ამოღებულია ფულადი თანხები ნივთმტკიცების სახით.

ბრიფინგის დასასრულს ია ახალაიამ საჯარო მოხელეებს მიმართა და კორუფციასთან ბრძოლის მკაცრი კურსი დააანონსა.

„მივმართავთ ყველა იმ საჯარო მოხელეს, ვინც ჯერ კიდევ ვერ გაითავისა, რომ კორუფცია ჩვენს ქვეყანაში დაუსჯელი ვერ დარჩება მაქსიმალური პასუხისმგებლობით მოეკიდონ დაკისრებულ მოვალეობებს და თავი შეიკავონ მსგავსი დანაშაულებრივი ქმედებებისგან“, - განაცხადა ახალაიამ.

საგამოძიებო სამსახურის განმარტებით, კორუფციული ფაქტების აღმოფხვრის მიზნით აქტიური მუშაობა გრძელდება.