AI შეკვეთების მკვეთრი ზრდის ფონზე Cisco-ს აქციების ფასი 19%-ით გაიზარდა

ტექნოლოგიურმა ფირმა Cisco-მ მესამე კვარტალის ფინანსური ანგარიში წარადგინა. არსებული ინფორმაციით, კომპანიის შემოსავალმა $15.84 მილიარდი შეადგინა, რაც გასული წლის მაჩვენებელს 12%-ით აღემატება და ანალიტიკოსების პროგნოზს, $15.56 მილიარდს მცირედით აჭარბებს. საყურადღებოა, რომ თუ გასული წლის ანალოგიურ პერიოდში კომპანიამ $2.49 მილიარდი მიიღო, ამჯერად წმინდა მოგებამ $3.37 მილიარდი შეადგინა. კორექტირებული მოგება კი თითო აქციაზე $1.06-ია, რაც უოლ-სტრიტის მოლოდინს, $1.04 მცირედით აჭარბებს.

შემოსავლების ზრდის ძირითადი წყარო ქსელური მოწყობილობების სეგმენტი გახდა. ამ მიმართულებით შემოსავალი 25%-ით გაიზარდა და $8.82 მილიარდს მიაღწია. მნიშვნელოვანია ითქვას, რომ Cisco-მ ხელოვნური ინტელექტის ინფრასტრუქტურისა და ე.წ. ჰაიპერსკეილერების მომსახურებისთვის $5.3 მილიარდის შეკვეთები მიიღო. პარალელურად, კომპანიამ წარადგინა ის ახალი თაობის პროცესორებზე მომუშავე კომუტატორები და როუტერები, რომლებიც მონაცემთა დამუშავების სიმძლავრეს საგრძნობლად ზრდის. უსაფრთხოების სეგმენტში შემოსავალი სტაბილური დარჩა და $2 მილიარდი შეადგინა.

პარალელურად, Cisco-მ 4,000-მდე თანამშრომლის შემცირების შესახებაც განაცხადა. ეს გადაწყვეტილება გლობალური სამუშაო ძალის 5%-ზე ნაკლებს მოიცავს. კომპანიის აღმასრულებელი დირექტორის, ჩაკ რობინსის განმარტებით, ეს ნაბიჯი მიზნად ინვესტიციების ხელოვნური ინტელექტის სფეროში გადამისამართებას ისახავს. როგორც ირკვევა, რეორგანიზაციასთან დაკავშირებული კომპენსაციების ხარჯები $1 მილიარდს მიაღწევს. აქედან $450 მილიონი მიმდინარე ფინანსური წლის მეოთხე კვარტალში აისახება.

რაც შეეხება სამომავლო გეგმებს, Cisco-მ მომდევნო კვარტალის საპროგნოზო მაჩვენებლებიც გაზარდა. კომპანია $16.7-$16.9 მილიარდის ოდენობის შემოსავალს ელოდება. ნავარაუდები კორექტირებული მოგება კი თითო აქციაზე $1.16-$1.18-ს შეადგენს.

კვარტალური შედეგების გამოქვეყნების შემდეგ კომპანიის აქციების ფასი 19%-ით გაიზარდა. ამჟამად ერთი აქცია $118.25-ად იყიდება, კაპიტალიზაცია კი $480 მილიარდს შეადგენს.