Airbnb-ის შემოსავალმა პროგნოზს გადააჭარბა, თუმცა ირანში მიმდინარე ომის გამო ჯავშნების გაუქმების მაჩვენებელი გაიზარდა

სასტუმროების ინდუსტრიის ამერიკულმა გიგანტმა Airbnb-მ პირველი კვარტალის ფინანსური ანგარიში წარადგინა. კომპანიის შემოსავალმა $2.68 მილიარდი შეადგინა, რაც წლიურ ჭრილში 18%-იან ზრდას ნიშნავს და ანალიტიკოსების $2.62-მილიარდიან მოლოდინს აჭარბებს. წმინდა მოგება გასული წლის ანალოგიური პერიოდის $154 მილიონიდან $160 მილიონამდე გაიზარდა. მიუხედავად ამისა, ერთ აქციაზე მოგებამ (EPS) $0.26 შეადგინა, რაც Wall Street-ის მიერ პროგნოზირებულ $0.29-ს ჩამორჩა.

როგორც ირკვევა, ირანში მიმდინარე ომის გამო EMEA-სა და აზია-წყნარი ოკეანის რეგიონებში ჯავშნების გაუქმების მაჩვენებელი გაიზარდა. აღნიშნულმა კონფლიქტმა მეორე კვარტალში ჯავშნების რაოდენობაზე 100-საბაზისო პუნქტის მოცულობის უარყოფითი გავლენა შეიძლება იქონიოს. ამ ფონზე, ჯავშნების მთლიანმა ღირებულებამ (GBV) $29.2 მილიარდი შეადგინა, რაც წინა წლის მაჩვენებელზე 19%-ით მეტია. პარალელურად, დაჯავშნილი ღამეებისა და ადგილების რაოდენობა 9%-ით გაიზარდა და 156.2 მილიონს მიაღწია.

მნიშვნელოვანია ითქვას, რომ კომპანიამ წლის ბოლომდე შემოსავლების ზრდის პროგნოზი გააუმჯობესა. Airbnb მიმდინარე წლის ზაფხულში FIFA-ს მსოფლიო ჩემპიონატის ფარგლებში რეკორდული რაოდენობის სტუმრის მიღებას გეგმავს. ტურნირის მასპინძელ 16 ქალაქში პლატფორმას 100 000-ზე მეტი ახალი საცხოვრებელი ობიექტი დაემატა. კომპანიამ ახალი მასპინძლების მოსაზიდად $750-იანი წამახალისებელი პროგრამაც აამოქმედა, რაც გაზრდილი მოთხოვნის დაკმაყოფილებას ისახავს მიზნად.

ცნობისთვის, მილანო-კორტინას ზამთრის ოლიმპიურმა და პარალიმპიურმა თამაშებმა პლატფორმაზე 200,000-მდე სტუმარი მოიზიდა. მასპინძელ ბაზარზე საცხოვრებელი ობიექტების მიწოდება თითქმის მესამედით გაიზარდა.

რაც შეეხება რეაქციას საფონდო ბირჟაზე, გახანგრძლივებულ სავაჭრო სესიაზე აქციების ფასი 0.41%-ით გაიზარდა. ამჟამად Airbnb-ს ერთი აქცია $141.46-ად იყიდება, კაპიტალიზაცია კი $89.12 მილიარდს შეადგენს.