"აჯიკა" იაპონიაში მეორე ფილიალის გახსნას გეგმავს - რა გეგმები აქვს ობიექტს?

ტოკიოში მოქმედი ქართული რესტორანი „აჯიკა“ მეორე ფილიალის გახსნას გეგმავს. როგორც რესტორნის თანადამფუძნებელი გიორგი აბულაძე BM.GE-სთან აცხადებს, გაფართოებისთვის ტოკიოს ცენტრალური უბნები განიხილება.

„მომდევნო ერთი წლის მთავარი მიზანი AJIKA-ს მეორე ფილიალის გახსნაა და ამისთვის ტოკიოს ცენტრალურ უბნებს განვიხილავთ. დაახლოებით ისეთივე კონცეფციისა და დატვირთვის ფილიალი იქნება, როგორიც პირველი ფილიალია. თუმცა ამ ეტაპზე შესაბამისი ლოკაციის მოძიების პროცესში ვართ“, - ამბობს გიორგი აბულაძე, თუმცა პროექტის საინვესტიციო ღირებულების დასახელებისგან თავს იკავებს.

გაფართოების გადაწყვეტილებას რესტორნის პირველი ფილიალის შედეგები დაედო საფუძვლად. „აჯიკა“ 2025 წლის სექტემბერში, ტოკიოს კაგურაძაკას უბანში გაიხსნა და ოპერირების პირველ წელს მოლოდინს გადააჭარბა.

„46-ადგილიანი რესტორანი პარასკევსა და შაბათ-კვირას საღამოს, როგორც წესი, სრულად დაჯავშნილია, ლანჩის საათებში კი რიგებიც იქმნება. შემოსავლის დაახლოებით 60-65% საკვებზე მოდის, 30-35% კი სასმელებზე, ძირითადად ქართულ ღვინოზე. სტუმრების დაახლოებით 85-90% იაპონელია. ძირითადად, ესენი არიან 30-60 წლის, გასტრონომიით დაინტერესებული ადამიანები, წყვილები და მეგობრების ჯგუფები. ბევრი მომხმარებელი ბრუნდება, ზოგი ლანჩზე კვირაში რამდენჯერმე მოდის. განმეორებითი ვიზიტების წილი დაახლოებით 30%-ია“, - აცხადებს გიორგი აბულაძე.

მეორე ფილიალის გახსნასთან ერთად, კომპანია მენიუსა და ღვინის ასორტიმენტის გაფართოებას, ქართულ ღვინოსთან დაკავშირებული ღონისძიებების ჩატარებასა და იაპონიაში ქართული პროდუქციის იმპორტისა და დისტრიბუციის განვითარებას გეგმავს.

აბულაძის თქმით, კომპანიის გრძელვადიანი მიზანი იაპონელი მომხმარებლებისთვის ქართული სამზარეულოსა და ღვინის უფრო ფართოდ გაცნობაა. ამასთან, „აჯიკა“ იაპონიაში ქართული ღვინის ჰაბად ჩამოყალიბებასა და ქართველი მეღვინეებისთვის ადგილობრივ ბაზარზე შესვლის ხელშეწყობას ისახავს მიზნად.