ახალ პატრიარქს გაფართოებულ კრებაზე 11 მაისს აირჩევენ

საქართველოს მართლმადიდებელი ეკლესიის გაფართოებული კრება 2026 წლის 11 მაისს, 13:00 საათზე ჩაინიშნა. ინფორმაციას საპატრიარქოს საზოგადოებასთან ურთიერთობის სამსახური ავრცელებს.

მათივე ცნობით, კრება თბილისში, ყოვლადწმინდა სამების სახელობის საპატრიარქო ტაძარში გაიმართება. საორგანიზაციო და ტექნიკური დეტალები მოგვიანებით გახდება ცნობილი.

28 აპრილს გამართულ წმინდა სინოდის სხდომაზე მღვდელმთავრებმა პატრიარქობის სამი კანდიდატი შეარჩიეს, რომლებიც გაფართოებულ კრებაზე წარდგებიან:

• მიტროპოლიტი შიო (მუჯირი) - კათოლიკოს-პატრიარქის ტახტის მოსაყდრე, სენაკისა და ჩხოროწყუს მიტროპოლიტი (სინოდზე მიიღო 20 ხმა); • მიტროპოლიტი იობი (აქიაშვილი) - მროველ-ურბნელი მიტროპოლიტი (სინოდზე მიიღო 7 ხმა); • მიტროპოლიტი გრიგოლი (ბერბიჭაშვილი) - ფოთისა და ხობის მიტროპოლიტი (სინოდზე მიიღო 7 ხმა).

როგორ ირჩევენ პატრიარქს?

საქართველოს კათოლიკოს-პატრიარქის არჩევის წესი 1995 წელს მიღებული ეკლესიის მართვა-გამგეობის დებულებით რეგულირდება.

კენჭისყრაში მონაწილეობის უფლება მხოლოდ მღვდელმთავრებს აქვთ.

არჩეულად ჩაითვლება ის კანდიდატი, რომელიც კრების მონაწილე მღვდელმთავართა ხმების ნახევარზე მეტს (50% + 1 ხმა) დააგროვებს.

თუ პირველ ტურში ვერცერთი კანდიდატი ვერ მიიღებს ხმათა საჭირო რაოდენობას, ტარდება ხელმეორე კენჭისყრა. მასში მონაწილეობას ის ორი კანდიდატი მიიღებს, რომლებმაც პირველ ტურში საუკეთესო შედეგი აჩვენეს.

მოქმედი დებულება 1995 წლის 18-19 სექტემბერს, სვეტიცხოვლის ტაძარში გამართულ საქართველოს ეკლესიის გაფართოებულ მე-13 კრებაზეა მიღებული.